Еўразвяз не прызнаў выбары ў Беларусі :: Хартыя'97 :: Навiны

Нямеччына як краіна-старшыня Еўразвяза раскрытыкавала праведзеныя 14 студзеня ў Беларусі выбары ў мясцовыя заканадаўчыя органы – Саветы дэпутатаў 25-га склікання. У паведамленні МЗС Нямеччыны адзначаецца, што ў якасці страшыні Еўрапейскага Звяза, “мы з шкадаваннем канстатуем, што выбары ў Беларусі 14 студзеня не адпавядалі дэмакратычным стандартам. На жаль, беларускі ўрад у чарговы раз не паклапаціўся пра тое, каб зрабіць асноўныя перадумовы для свабоднага волевыяўлення выбаршчыкаў”, – перадае РІА “Новости”.

На меркаванне Нямеччыны, падчас выбараў “у значнай меры былі ўшчэмленыя правы грамадзянаў на свабоду меркавання, аб’яднанняў і сходаў, а таксама правы апазіцыі”.

“Еўразвяз ведае пра выкарыстанне міліцыі, пра перашкоды пры рэгістрацыі кандыдатаў і арышты апазіцыйных палітыкаў, а таксама мясцовых назіральнікаў. Таксама зноў выкарыстоўвалася практыка датэрміновага галасавання, якая асабліва лёгка дазваляе падтасоўваць вынікі, прычым у некаторых выпадках людзей нават прымушалі да гэтай формы падачы галасоў. Дзяржаўныя інстанцыі на ўсіх узроўнях націскалі на выбаршчыкаў у карысць блізкіх да ўрада кандыдатаў”, – адзначаецца ў заяве.

“Старшыня зноў звяртаецца да Беларусі ад імя ЕЗ з прапановай аб паўнавартасным партнёрстве ў рамках палітыкі добрасуседства. Пэўныя прапановы наконт гэтага можна знайсці ў дакуменце “Што Еўразвяз мог бы даць Беларусі”, які быў прадстаўлены ў лістападзе 2006 года”, – гаворыцца ў прэс-рэлізе. Аднак перадумовай для гэтага, як падкрэслівае Нямеччына, “мусіць быць прызнанне беларускім урадам дэмакратычных каштоўнасцяў, правоў чалавека і нормаў прававой дзяржавы, а таксама пачатак дэмакратычных рэформаў”.

“Старшыня расчараваны тым, што беларускі ўрад ізноў не выкарыстаў шанец шляхам яснага прызнання дэмакратыі і прававой дзяржаўнасці стварыць новую базу сумесных адносінаў”, – гаворыцца ў заяве МЗС Нямеччыны.