Фашысты дагэтуль не знойдзеныя :: Хартыя'97 :: Навiны

Трэці месяц дазнаўца УУС Цэнтральнага раёна Менска Ганна Собаль вядзе следства па крымінальнай справе пра апаганенне ў Менску мемарыяла ахвярам Халакоста “Яма”. Пра гэта ў інтэрв’ю БелаПАН паведаміў супрацоўнік прэс-службы ГУУС Менгарвыканкама Яўген Сачык.

Паводле яго слоў, з моманту ўзбуджэння крымінальнай справы па артыкуле 341 Крымінальнага кодэкса (апаганенне будынкаў і псаванне маёмасці) праведзены ўвесь комплекс неабходных аператыўна-вышуковых мерапрыемстваў. “У прыватнасці, былі апытаныя дзесяткі людзей для таго, каб знайсці сведак дадзенага здарэння, праведзена некалькі экспертыз, у тым ліку дактыласкапічная і судова-лінгвістычная. Акрамя таго, для высветлення падазраваных у дадзеным злачынстве паінфармаваныя ўсе міліцэйскія падраздзяленні сталіцы”, – сказаў Я.Сачык.

Аднак, паводле яго слоў, пакуль не дасягнутыя істотныя вынікі ў расследаванні справы і не высветленыя асобы падазраваных у здзяйсненні гэтага злачынства. Расследаванне будзе працягвацца яшчэ як мінімум месяц.

12 лістапада 2006 года невядомымі асобамі быў апаганены мемарыял “Яма”, што знаходзіцца па вуліцы Мельникайте. Тут 2 сакавіка 1942 года фашысты знішчылі 5 тыс. вязняў Менскага гета, а ўсяго за перыяд акупацыі горада ў гады другой сусветнай вайны – 100 тыс. габрэяў.

На абеліску помніка невядомыя намалявалі белай фарбай свастыку памерам 35 на 35 сантыметраў, а таксама выпацкалі белай фарбай фігуры бронзавай скульптурнай кампазіцыі “Апошні шлях”, размешчанай уздоўж прыступак, якія вядуць да цэнтра мемарыяла. За абеліскам і на алеі Праведнікаў народаў свету, што ўваходзіць у склад мемарыяла, знойдзеныя дзве ўлёткі ( яны заклікаюць да “бескампраміснай барацьбы” пры дапамозе “прамога дзеяння” з “юдаізмам і масонствам – ворагамі і здраднікамі бацькаўшчыны”). Улёткі падпісаныя “Фронтам Арыйскага Супраціву “Белая Русь”.

У той самы дзень на фасадзе сталічнага будынка па вуліцы Уральскай у Партызанскім раёне Менска, дзе размешчаны Ізраільскі культурна-інфармацыйны цэнтр пры амбасадзе Ізраіля ў Беларусі, невядомымі былі намаляваныя свастыкі і зробленыя надпісы “Бі жыдоў”.