Абаронца намётавага мястэчка на плошчы Каліноўскага стаў дэпутатам гарсавета :: Хартыя'97 :: Навiны

У выканкаме горада Фаніпаля вывешаныя афіцыйныя вынікі галасавання. Дэпутатам Фаніпальскага гарсавета стаў сябра Аб’яднанай грамадзянскай партыі Аляксандр Залатар.

У сваіх выбарчых улётках Аляксандр заявіў выбаршчыкам, што за апошнія 10 год прэзідэнцкая вертыкаль праводзіць у выбарныя органы ўлады ўсіх узроўняў толькі сваіх людзей. Таму кішэнныя дэпутаты не цікавяцца, як размяркоўваецца бюджэт раёна, чаму адсутнічае дзяржаўнае будаўніцтва ў горадзе, чаму на ўвесь Фаніпаль і некалькі вёсак усяго адна машына “хуткай дапамогі”, паведамляе прэс-служба АГП.

Аляксандр Залатар агучыў свае прыярытэты: прамыя выбары мэра, рамонт дарог, развіццё інфраструктуры і шмат іншага. І у выніку – перамога! Сфальсіфікаваць вынікі выбараў у яго акрузе было практычна немагчыма. У ім пражывае 528 выбаршчыкаў, і кожнага, хто за яго прагаласаваў, Аляксандр ведае.

Супернікам у Аляксандра Залатара быў Іван Слука, начальнік ЖЭУ. У адказ на пытанне прэс-службы АГП, што прынесла яму перамогу, Залатар сказаў: “Трэба быць на галаву вышэй за суперніка”.

Цікава, што сам Аляксандр цяпер часова беспрацоўны. Да прэзідэнцкіх выбараў 2006 года ён працаваў у сферы камунальных паслуг Фаніпаля. Адразу пасля таго, як на Кастрычніцкай плошчы вырас намётавы лагер, Аляксандр узяў «адгулы» і прыехаў у Менск. Яго затрымалі ў ноч з 23 на 24 сакавіка. Ён адсядзеў 10 сутак і вярнуўся дахаты, дзе і пазнаў пра сваё звальненне. З таго часу знайсці Аляксандр не можа знайсці працу ў Фаніпале.