Генпракурору няма чаго сказаць пра выкраданні лідэраў апазіцыі? :: Хартыя'97 :: Навiны

Праваахоўныя органы Беларусі працягваюць расследаванне гучных крымінальных спраў па заявах пра знікненні грамадзянаў, паведаміў на прэс-канферэнцыі ў Менску генеральны пракурор Беларусі Пётр Міклашэвіч. Паводле яго слоў, “пракуратура, МУС, іншыя праваахоўныя органы працягваюць расследаваць крымінальныя справы аб гучных знікненнях”. Так генпракурор адказаў на пытанне журналістаў пра тое, як праваахоўныя органы Беларусі расследуюць знікненні ў Беларусі ў 1999 – 2000 гады лідэраў беларускай апазіцыі і журналіста.

У 1999 годзе ў краіне былі выкрадзеныя і забітыя віцэ-спікер Вярхоўнага Савета13-га склікання Віктар Ганчар, былы міністр унутраных спраў Юрый Захаранка, бізнэсмэн і грамадскі дзеяч Анатоль Красоўскі. У 2000 годзе ў Менску быў выкрадзены журналіст Зміцер Завадскі. Міжнародныя структуры падазраюць у дачыненні да выкраданняў і забойстваў гэтых людзей вышэйшых беларускіх службоўцаў – міністра ўнутраных спраў Уладзіміра Навумава, сакратара Савета Бяспекі Віктара Шэймана, камандзіра спецназа ўнутраных войскаў Дзмітрыя Паўлічэнку і экс-кіраўніка МУС Юрыя Сівакова.

За ўсе гэтыя гады ўлады Беларусі не правялі належнага расследавання выкрадання апазіцыянераў. Вінаватыя ў выкраданнях дагэтуль не прыцягнутыя да адказнасці.