Расея тармозіць экспарт беларускага харчавання на расейскі рынак :: Хартыя'97 :: Навiны

Новыя ўмовы паставак беларускага харчавання на рынак Расеі з’яўляюцца адным з элементаў нядобрасумленнай канкурэнцыі з расейскага боку, лічыць кіраўнік камісіі па аграрных пытаннях “палаты прадстаўнікоў” “нацыянальнага сходу” Беларусі Міхаіл Русы. “Пад добрымі намерамі расейскага боку імпартаваць беларускую прадукцыю толькі з атэставаных Россельхознадзором прадпрыемстваў крыецца наўмыснае тармажэнне рэалізацыі нашай прадукцыі на расейскім рынку”, – адзначыў М.Русы “Інтэрфаксу”.

Кіраўнік камісіі зазначыў, што “ўсе асноўныя пастаўшчыкі прадукцыі жывёлагадоўлі атэставаныя і сертыфікаваныя па самых высокіх патрабаваннях якасці і бяспекі”. “Ветэрынарная база і кантроль на нашых прадпрыемствах значна вышэй, чым на расейскіх”, – сказаў М.Русы. Ён удакладніў, што “прадукцыя жывёлагадоўлі, напрыклад, буйной рагатай жывёлы, пастаўляецца на расейскі рынак толькі з мясакамбінатаў, дзе прапісваецца пэўны пастаўшчык і пэўны спажывец у Расеі. Па малочных прадуктах, птушцы ўсё робіцца гэтаксама”, – сказаў “палатнік”.

Паводле яго слоў, “няма ніякага страху і праблемы ў тым, што ў Беларусь прыедуць спецыялісты Росссельхознадзора, якія выдатна ведаюць пра адсутнасць парушэнняў з боку беларускіх экспарцёраў. Хай упэўняцца ў гэтым яшчэ раз”. Разам з тым, распавёў М.Русы, “працэс атэстацыі прадпрыемстваў можа расцягнуцца настолькі, што беларуская прадукцыя знікне з расейскага рынку і ў выніку пацерпіць расейскі спажывец”. У выцясненні беларускага экспарту з рынку Расеі, як лічыць кіраўнік аграрнай камісіі, зацікаўленыя “расейскія структуры, якія займаюцца імпартам сельгаспрадукцыі з краін далёкага замежжа”.

“Яны штогод імпартуюць з гэтых краін каля 3 млн тон мяса і мясных прадуктаў. Няма ніякай гарантыі, што гэтая прадукцыя – не самай лепшай якасці – не рээкспартуецца ў Беларусь, але мы не прыдзіраемся да іх каўбасы і пяльменяў. Хоць, пэўна, і варта было б, але мы верым сваім расейскім партнёрам”, – адзначыў М.Русы.

Як паведамлялася раней, Расея будзе імпартаваць мяса, малако і рыбу з Беларусі толькі з атэставаных Россельхознадзором прадпрыемстваў.

Кіраўнік Россельхознадзора Сяргей Данкверт адзначыў, што новыя ўмовы гандлю прадукцыяй жывёлагадоўлі і рыбай “ніяк не звязаныя з апошнімі падзеямі ва ўзаемаадносінах дзвюх краін у гандлі газам і нафтай”. “На Беларусь, як і на іншыя краіны СНД, будзе распаўсюджаная практыка, якая выкарыстоўваецца ў гандлі з краінамі дальняга замежжа – прадукцыя патсаўляецца толькі з прадпрыемстваў, што былі праінспектаваныя і атэставаныя Россельхознадзором”, – зазначыў ён.