Ці адбудуцца акцыі пратэсту ў сакавіку? :: Хартыя'97 :: Навiны

Роўна праз два месяцы споўніцца год, як у Беларусі адбыліся прэзідэнцкія выбары. Вынікі выбараў, па ацэнцы міжнародных назіральнікаў, былі сфальсіфікаваныя, а самі выбары не прызнаныя свабоднымі і справядлівымі. Дзесяткі тысяч беларусаў выйшлі на Кастрычніцкую плошчу Менска, якая неўзабаве была перайменаваная імі ў плошчу Каліноўскага, каб выказаць пратэст. На агульную думку, апазіцыя тады была насамрэч аб’яднаная і выглядала вельмі годна. У канцы лістапада Палітрада дэмакратычных сілаў прыняла рашэнне аб правядзенні масавай акцыі 19 сакавіка 2007 года. Адзін з лідэраў апазіцыі Анатоль Лябедзька тады выступіў з заклікам вярнуцца на плошчу Каліноўскага 19 сакавіка а 20-й гадзіне. Прэс-цэнтр Хартыі’97 пацікавіўся ў лідэраў апазіцыйных палітычных партый, ці вядзецца падрыхтоўка да правядзення 19 сакавіка 2007 года масавых акцый.

Анатоль Лябедзька, лідэр Аб’яднанай грамадзянскай партыі:

– Я падчас апошняга паседжання Палітрады аб’яднаных дэмакратычных сілаў цярпліва чакаў, што хтосьці ўзгадае гэтую тэму, падніме гэтае пытанне. Але гэтага не адбылося. Пасля майго патрабавання паўтара месяца таму гэтае пытанне абмяркоўвалася, я заклікаў уключыць ва ўлёткі дэмакратычных кандыдатаў у дэпутаты ў мясцовыя Саветы фразу: “19 сакавіка 2007 года а 20 гадзіне мы вяртаемся на плошчу Каліноўскага”. Але калі выйшаў вялікі тыраж гэтых улётак, гэтай фразы там не было. Мабыць, не ўсе ў палітычнай кааліцыі хочуць выкарыстаць фактар вуліцы ў справе дэмакратызацыі Беларусі.

Цяпер пытанне правядзення акцый 19 сакавіка завісла, усё толькі на словах, усе ківаюць галавой. Трэба каб хтосьці праявіў ініцыятыву. У нас было два кандыдаты ў прэзідэнты. 19 сакавіка – гадавіна прэзідэнцкіх выбараў. Карэктна, каб гэтыя людзі і іх структуры ўзялі на сябе гэтую ініцыятыву. Мы гатовы ўдзельнічаць у гэтых акцыях, але, калі ў іншых няма па гэтым пытанні актыўнасці, я таксама магу сыйсці ў нейкую нішу, мне таксама ёсць чым займацца… Нацыянальным камітэтам, напрыклад.

Аляксандр Бухвостаў, прафсаюзны лідэр, Сустаршыня Саюза левых партый:

– Становішча трохі ўскладнілася. Няма адзінства ў правядзенні Кангрэса дэмакратычных сілаў. Мы думалі, што спачатку трэба правесці кангрэс, кансалідавацца і працягнуць масавыя выступы. Але цяпер у нас няма адзінства па гэтым пытанні. Калі неўзабаве яно будзе, то падрыхтоўка да кангрэса будзе падрыхтоўкай да далейшых акцый.

Не магу сказаць, што цяпер нешта рыхтуецца, рэальнай працы пакуль не вядзецца, усё застаецца ў пражэктах. Мы не адмовіліся ад ідэі правядзення акцый пратэсту, але я думаю, што тут нашы жаданні не заўсёды супадаюць з нашымі магчымасцямі на ўздым вялікіх мас людзей. Нейкая актыўная частка людзей – моладзь, палітычныя партыі – выйдуць, вядома, на вуліцы, але што будуць масавыя выступы – сумняваюся. Для гэтага патрэбна больш сур’ёзная падрыхтоўка.

Сяргей Калякін, лідэр Партыі камуністаў Беларускай:

– Без каментароў. На маю думку, гэта тое пытанне, якое трэба пакінуць без каментароў. Думаю, што праца ў гэтым кірунку вядзецца. Але кім – без каментароў.

Вінцук Вячорка, лідэр Партыі БНФ:

– Што тычыцца Партыі БНФ, то мы бачым асноўным палітычным днем – 25 сакавіка, Дзень Волі. Трэба мабілізаваць людей пад пэўнымі і актуальнымі лозунгамі. Успамінаць тое, што было год таму – не вельмі прадуктыўна. Так, падзеі 19 сакавіка мінулага года – гэта было абуджэнне, уздым, але мы павінны высоўваць новыя лозунгі, адпаведныя сённяшняму дню. Гэтыя лозунгі – абарона незалежнасці Беларусі, вяртанне Беларусі ў Еўропу, выратаванне краіны ад эканамічнага абвалу.