Кіраўнік ПАРЕ паставіў умову – вызваліць палітвязняў :: Хартыя'97 :: Навiны

Крокам да збліжэння Еўрапейскага Звяза і Беларусі мусіла б быць вызваленне людзей, якіх ЕЗ лічыць палітвязнямі. Пра гэта 18 студзеня паводле вынікаў сустрэчы з старшынёй “палаты прадстаўнікоў” Уладзімірам Канаплёвым паведаміў журналістам старшыня Парламентскай Асамблеі Рады Еўропы (ПАРЕ) Рэнэ ван дэр Ліндэн.

Кіраўнік ПАРЕ назваў таксама ў якасці крокаў да збліжэння ЕЗ і Беларусі магчымасць адкрыцця Інфармацыйнага бюро Рады Еўропы, узмацненне ролі як праўрадавых, так і апазіцыйных партый у палітычным жыцці краіны. Рэнэ ван дэр Ліндэн параўнаў палітыку з футбольным матчам, які “немагчымы без дзвюх каманд”, пры гэтым матч асабліва цікавы, “калі гуляюць дзве моцныя каманды”.

“Я вельмі спадзяюся, што дыялог пачнецца, тым больш што сітуацыя спрыяе гэтаму”, – сказаў кіраўнік ПАРЕ і нагадаў пра нядаўні эканамічны канфлікт Беларусі і Расеі.

У сваю чаргу У.Канаплёў адзначыў, што сёння няма падстаў для таго, каб Беларусь не мела статусу спецыяльна запрошанага ў ПАРЕ. Паводле яго слоў, “усе спрэчныя пытанні мы адзначылі”.

Рэнэ ван дэр Ліндэн падкрэсліў, што першыя крокі да збліжэння пазіцый мусіць зрабіць Беларусь. “Беларусь не бачыць ніякай карысці ў тым, каб заставацца ізаляванай. Яна зацікаўленая ў тым, каб стаць часткай Еўропы”, – лічыць кіраўнік ПАРЕ.

Учора старшыня Парламентскай Асамблеі Рады Еўропы (ПАРЕ) Рэнэ ван дэр Ліндэн сустрэўся з прадстаўнікамі беларускай апазіцыі. Сустрэча адбылася ў рэзідэнцыі амбасадара Нямеччыны ў Менску – гэтая краіна цяпер старшынствуе ў Еўразвязе.

Як паведаміў БелаПАН старшыня Аб’яднанай грамадзянскай партыі (АГП) Анатоль Лябедзька, на сустрэчы прысутнічаў лідэр аб’яднаных дэмакратычных сілаў Аляксандр Мілінкевіч, кіраўнік Партыі БНФ Вінцук Вячорка, выканаўца абавязкаў старшыні Беларускай сацыял-дэмакратычнай партыі (Грамада) Анатоль Ляўковіч, лідэр Партыі камуністаў Беларускай Сяргей Калякін.

“Рэнэ ван дэр Ліндэн растлумачыў мэты свайго візіту ў Беларусь”, – сказаў А.Лябедзька. Паводле яго слоў, Р. ван дэр Ліндэн выставіў беларускай уладзе шэраг умоў, пры выкананні якіх можа адбыцца яго візіт. “Гэта сустрэчы з апазіцыяй, прадстаўнікамі грамадзянскай супольнасці і царкоўных суполак, лекцыя перад студэнтамі, а таксама магчымасць наведаць у турме Аляксандра Казуліна. Усе гэтыя патрабаванні былі выкананыя, за выключэннем апошняга. Замест гэтага ван дэр Ліндэн дамовіўся наконт сустрэчы з жонкай палітвязня Ірынай Казулінай”, – сказаў А.Лябедзька.

Старшыня ПАРЕ і прадстаўнікі палітычных партый абмеркавалі ўмовы, на якіх гэтая еўрапейская структура можа супрацоўнічаць з Беларуссю. “Рэнэ ван дэр Ліндэн прапанаваў стварыць інфармацыйны цэнтр Рады Еўропы ў Менску, а таксама прыцягнуць міжнародных экспертаў па сітуацыі з палітвязнямі ў Беларусі. Мы вызначылі прыярытэты, па якіх павінен адбывацца дыялог: змены ў выбарчым заканадаўстве, свабодныя СМІ, вызваленне палітвязняў і магчымасць развіцця грамадзянскай суполкі ў Беларусі”, – сказаў А.Лябедзька.

На меркаванне лідэра АГП, Р. ван дэр Ліндэн “зацікаўлены ў дыялогу, аднак ён разумее і беларускія рэаліі: наколькі афіцыйны Менск здольны на рэальны дыялог, а не на яго імітацыю”.

Пры гэтым, па словах А.Лябедзькі, зыходным пунктам для дыялогу ПАРЕ і афіцыйнага Менска Р. ван дэр Ліндэн лічыць адсутнасць у Беларусі палітвязняў.

Фота yahoo.com