У турму да Казуліна ван дэр Ліндэна не пусцілі :: Хартыя'97 :: Навiны

Кіраўнік Парламенцкай Асамблеі Рады Еўропы (ПАРЕ) Рэнэ ван дэр Ліндэн сустрэўся 19 студзеня з жонкай экс-кандыдата ў прэзідэнты Беларусі Аляксандра Казуліна. Як паведаміла БелаПАН Ірына Казуліна, на сустрэчы прысутнічалі таксама прадстаўнікі дэмакратычных арганізацый.

“Гэта быў абмен думкамі пра тое, як Еўропа і, у прыватнасці, ПАРЕ мусяць выбудоўваць палітыку з беларускімі ўладамі, – сказала І.Казуліна. – Старшыня ПАРЕ ўважліва ўсіх выслухоўваў, задаваў пытанні, удакладняў пазіцыі”. Як адзначыла І.Казуліна, гэта была “сяброўская сустрэча”, якая паказала, што “абодва бакі хочуць супрацоўнічаць і прасоўвацца наперад у будаванні дэмакратычнага грамадства ў Беларусі”.

Паводле яе слоў, Рэнэ ван дэр Ліндэн паведаміў, што практычна ўсе яго патрабаванні адносна арганізацыі візіту ў Менск былі выкананыя, акрамя магчымасці сустрэнуцца з асуджаным Аляксандрам Казуліным. “Але ён спадзяецца, што амбасадару Нямеччыны Марціну Хекеру неўзабаве дазволяць наведаць Казуліна”, – адзначыла жонка экс-кандыдата ў прэзідэнты. Яна таксама падкрэсліла, што, па словах кіраўніка ПАРЕ, ён адмовіўся ад сустрэчы з Аляксандрам Лукашэнкам.

Аднак, як паведаміў БелаПАН кіраўнік прэс-службы Лукашэнкі Павел Лёгкі, такая сустрэча і не планавалася.