«Вельмі хутка мы вернемся на нашу Плошчу» :: Хартыя'97 :: Навiны

Новы фільм вядомага кінарэжысёра Юрыя Хашчавацкага – “Плошча” – цяпер можна спампаваць у Інтэрнэце з некалькіх інтэрнэт-старонак. За два дні толькі з сайта ploshcha.wolnabialorus.org фільм спампавалі больш за 500 чалавек. Кінастужка распавядае пра падзеі сакавіка 2006 года ў Менску, калі дзесяткі тысяч чалавек выйшлі на вуліцы абараніць свой выбар і сваю краіну ад фальсіфікацый і татальнай хлусні падчас прэзідэнцкіх выбараў. Сёння фільм “Плошча” актыўна абмяркоўваюць наведвальнікі Інтэрнэту. “Вялікі дзякуй тым хлопцам і дзяўчатам, што былі побач у тыя нялёгкія дні, што і сёння вераць у Беларусь у наш шматпакутны, добры народ. Ужо вельмі хутка мы вернемся на нашу Плошчу і ўздыхнем поўнымі грудзьмі,” – такія водгукі можна прачытаць на беларускіх інтэрнэт-форумах.

Спампаваць фільм з Інтэрнэту можна з сайта ploshcha.wolnabialorus.org, інтэрнэт-старонак арганізацыі “Трэці шлях” – http://www.3dway.info/video/docfilm/ploscha(haschevatsky)/

Прапаноўваем водгукі пра фільм “Плошча” з форумаў Livejournal.com і tut.by.

Анклаў за СВАБОДУ:

Толькі што паглядзеў фільм. Спадабалася. Вельмі спадабалася. Абавязкова раздам копіі маім знаёмым і сябрам. Як непасрэдны ўдзельнік падзеяў магу сказаць, што ўсё паказанае і расказанае ўскалыхнула душу і сагрэла сэрца. Вялікі дзякуй тым хлопцам і дзяўчатам, што былі побач у тыя нялёгкія дні, што і сёння вераць у Беларусь у наш шматпакутны, добры народ. Ужо вельмі хутка мы вернемся на нашу Плошчу і ўздыхнем поўнымі грудзьмі. Жыве Беларусь!!!

Ruł

Вельмі моцны фільм... Даўно ўжо ня бачыў такіх выдатных адлюстраваньняў нашай беларускай рэчаіснасьці. Мая павага пану Хашчавацкаму

Мішэль:

Дарэчы, у соты раз гляджу, як Хашчавацкі абыграў гісторыю з інтэрв’ю пра Гітлера. Клас. Такіх нахабных і бегаючых вачэй нашага фюрэра я нідзе не сустракаў.

Olefftina:

А я дык Хашчавацкага не люблю. Такое адчуванне, што яго не ўзялі ў “Пастскрыптум”, і таму ён стаў хваліць апазіцыю. А так – прыёмы тыя ж, што і ў дзяржаўных прамывацеляў мазгоў. Але глядзець фільм было прыемна. Хаця б таму, што знятая наша Плошча. Вярнуцца б...

Zagorski

Нешта эмацыйна слабавата з майго пункту гледжання. Толькі апошнія 20 хвілін трохі пацешылі. Распавялі мала пра Казуліна і ўвогуле нічога пра падзеі Дня Волі. У цэлым – глядзіцца праўдзіва і дакументальна.

kisa_anuta

Паглядзела. Цікава стала – у самым пачатку фільма здыманне цудоўнай якасці. Няўжо рэжысёр адабраў відэаматэр’ял у тых трох людзей з камерамі? А вось убачыць ужывую тое, пра што столькі чулі...

withoutnick

Ужо глядзеў – у нас у дамашняй сетцы з снежня шпацыруе. Вельмі спадабаўся, адчуваецца прафесіяналізм Хашчавацкага. Але мне здалося – як быццам абрываецца. Вельмі бракуе там 25-га сакавіка, бо гэта таксама была плошча, лагічны працяг папярэдніх падзей, Дзень Волі нельга адрываць ад папярэдніх падзей, гэта адно цэлае. Уражанне такое, што аўтар пакінуў для сябе магчымасць 2-ой серыі. Што-ж, будзем чакаць...

З электроннай пошты:

Вялікі дзякуй ВАМ за фільм. Бязмежная павага Юрыю Хашчавацкаму і іншым ЛЮДЗЯМ, што мелі да гэтага дачыненне. Поспехаў у далейшай творчасці. Дзяніс і Таццяна.

Добры дзень. Ваш фільм “Плошча” мне вельмі спадабаўся. Дзякуй за тое, што вы робіце! Было вельмі цікава зірнуць на падзеі, што адбываліся летась з іншага пункту гледжання, бо падчас выбараў было вельмі цяжка атрымоўваць дакладную інфармацыю, асабліва за межамі Беларусі. Абавязкова парэкамендую гэты фільм сваім знаёмым і сябрам. З павагай, Аляксандр.