Прадпрымальнікі пачынаюць падрыхтоўку да акцый пратэсту :: Хартыя'97 :: Навiны

У Беларусі перадстрайкавая сітуацыя. 20 студзеня на сумесным паседжанні кіраўнікоў і прадстаўнікоў прадпрымальніцкіх структур Беларусі прынятае рашэнне аб падрыхтоўцы да розных акцый пратэсту індывідуальных прадпрымальнікаў. Сустрэча была ініцыяваная Каардынацыйнай радай індывідуальных прадпрымальнікаў Рэспублікі Беларусь і Стачкамам прадпрымальнікаў Рэспублікі Беларусь з актыўным удзелам праваабарончага руху “Наша Беларусь”.

Тыя людзі, што выступалі на паседжанні, адзначалі дрэннае становішча прадпрымальнікаў, асабліва, пасля апошняга Указа прэзідэнта Рэспублікі Беларусь №760 ад 29.12.2006. Падрабязны аналіз наступстваў уступлення ў сілу дадзенага Указа даў старшыня Кардынацыйнай рады ІП Рэспублікі Беларусь Анатоль Змітровіч.

Старшыня Стачкама прадпрымальнікаў Рэспублікі Беларусь Валеры Леванеўскі прапанаваў пачаць арганізацыю акцыі пратэсту, у прыватнасці, пачаць падрыхтоўку да мітынгу і падтрымаць ініцыятыву (РГА) “Перспектыва” па зборы подпісаў сярод прадпрымальнікаў краіны за занясенне зменаў ва Указ прэзідэнта Беларусі № 760 ад 29 снежня 2006 года.

Каардынатар праваабарончага руху “Наша Беларусь” Ігар Леднік зачытаў зварот у Парламенцкую Асамблею Рады Еўропы “Аб выпрацоўцы сумесных дзеянняў па ўступленні Беларусі ў Раду Еўропы”, які быў перададзены старшыні Парламенцкай Асамблеі Рады Еўропы Рэнэ ван дэр Ліндэну.

Аляксандр Макаеў, кіраўнік КР ІП г. Менска прапанаваў правесці мітынг у Менску.

Былі прынятыя два сумесныя рашэнні:

1. Аб правядзенні мітынгу індывідуальных прадпрымальнікаў у другой палове сакавіка 2007 года ў Менску.

2. Арганізаваць працу па зборы подпісаў сярод прадпрымальнікаў краіны за адмену дыскрымінацыйных палажэнняў указа прэзідэнта №760 ад 29 снежня 2006 года.