Лукашэнка збіраецца купляць нафту па сусветных цэнах? :: Хартыя'97 :: Навiны

Урад Беларусі цяпер вывучае пытанне, звязанае з магчымасцю паставак нафты на беларускія нафтаперапрацоўчыя заводы з балтыйскіх партоў па нафтаправодзе Вентспілс – Наваполацк, паведаміў Аляксандру Лукашэнку першы віцэ-прэм’ер урада Уладзімір Сямашка ў аўторак падчас наведвання кіраўніком дзяржавы РУП “Дружба” ў Наваполацку. Заяву віцэ-прэм’ера прэс-цэнтру Хартыі’97 пракаментаваў вядомы эканаміст, кіраўнік Цэнтра Мізэса Яраслаў Раманчук.

– Перавоз нафты танкерамі – агульнапрынятая сусветная практыка. Ноу-хау тут ніякага няма. Так працуюць польскія і балтыйскія НПЗ. Калі няма трубаправода, але ёсць выхад да мора – пытанне вырашаецца проста. Але гэтую перспектыву трэба разглядаць з пункту гледжання фактара цаны. А цэны на нафту ў гэтым выпадку будуць сусветнымі. Але тады і ў Расеі можна купляць нафту па сусветных цэнах.

Калі беларусы будуць гэтак працаваць, усе мары ўрада пра нафтавую “халяву” можна пакінуць у мінулым. Цяпер мы бачым, што пераход на рынкавыя ўмовы выкрывае ўсю шэрасць і “чарнуху” схем нафтаперапрацоўкі ў Беларусі. Цэны на расейскую нафту для нашай краіны сёння зусім не сусветныя. Аднак беларускія нафтаперапрацоўнікі адзначаюць, што яны працуюць на страту. Так, такая ў нас падатковая нагрузка на гэтыя прадпрыемствы, і такія “шэрыя схемы”. Без якіх яны, тым не менш, працаваць не хочуць.

Расейскія кампаніі таксама заявілі, што больш не выгодна працаваць у Беларусі. Гэта таксама нерэальна. На такіх умовах, страты ў расейцаў невялікія. Думаю, што іх сцвярджэнні скаардынаваныя з кіраўніцтвам Расеі.

А ўвогуле для таго, каб рэалізаваць стратэгію, прапанаваную Сямашкам, беларускім уладам, найперш, трэба нармалізаваць адносіны з Латвіяй або з Украінай. І іх рашэнне аб супрацоўніцтве з Беларуссю ўсё роўна будзе каардынавацца з ЕЗ. Нафтавы бізнэс вельмі палітызаваны. Калі беларусы хочуць уклініцца ў гэтыя праекты, трэбна рэальная, а не дэкларатыўная нармалізацыя стасункаў з Еўразвязам, – лічыць эканаміст.