Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Беларусь пакуль не будзе абсталёўваць мяжу з Расеяй 15:51, 23/01/2007
Беларусь не збіраецца ствараць памежную інфраструктуру на мяжы з Расейскай Федэрацыяй. Пра гэта сёння ў Берасці паведаміў журналістам старшыня Дзяржаўнага камітэта памежных войск генерал-лейтэнант Аляксандр Паўлоўскі.
“У рамках “саюзнай дзяржавы” як брацкая, дружалюбная краіна Беларусь не мае планаў па абсталяванні дзяржаўнай мяжы з Расеяй”, – падкрэсліў Аляксандр Паўлоўскі.
Наконт пытання пра прысутнасць аператыўных супрацоўнікаў памежнага ведамства Расеі ў раёнах мяжы з Беларуссю Аляксандр Паўлоўскі сказаў, што гэта нармалёвая ў дадзеным выпадку практыка і гэта не азначае, што Расея ўвяла з Беларуссю, як з Украінай і іншымі сумежнымі дзяржавамі, памежную зону. “У тым, што на мяжы з Беларуссю працуюць аператыўныя супрацоўнікі памежнага ведамства Расеі, няма ніякага сакрэту. Расейская Федэрацыя – суверэнная дзяржава, якая вырашае свае задачы па гарантаванні бяспекі законнымі метадамі”, – растлумачыў Аляксандр Паўлоўскі.
На думку старшыні Дзяржкамітэта памежных войск, прысутнасць расейскіх памежнікаў спрыяе таксама пашырэнню ўзаемадзеяння паміж сілавымі структурамі і праваахоўнымі органамі дзвюх краін.
