Мілінкевіч сёння сустрэнецца з генеральным сакратаром ХДС :: Хартыя'97 :: Навiны

Лідэр Аб’яднаных дэмакратычных сілаў Аляксандр Мілінкевіч сёння ў Менску сустрэнецца з генеральным сакратаром Хрысціянска-дэмакратычнага саюза Нямеччыны (ХДС) Рональдам Пофалам. ХДС – кіруючая партыя Нямеччыны.

Як паведамілі БелаПАН у прэс-службе А.Мілінкевіча, нямецкі палітык адной з мэт свайго візіту ў Беларусь назваў падтрымку дэмакратычнай апазіцыі ў яе “мірнай барацьбе за свабоды і правы чалавека”.

“Нямеччына будзе і надалей падтрымліваць лідэра дэмакратычнага руху Аляксандра Мілінкевіча і дапамагаць дэмакратычным сілам Беларусі. Гэта ўражвае – з якой адвагай беларусы змагаюцца за дэмакратычныя змены ў сваёй краіне”, – адзначыў Рональд Пофала напярэдадні візіту ў Беларусь.

У Менску, паведаміла прэс-служба Мілінкевіча, генеральны сакратар кіруючай партыі Нямеччыны найперш хоча ацаніць, ці адбыліся ў Беларусі якія-небудзь змены пасля дзвюх выбарчых кампаній: прэзідэнцкіх і мясцовых выбараў. Р.Пофала мае намер зноў звярнуцца да беларускіх уладаў з заклікам вызваліць усіх палітвязняў, аднавіць палітычныя свабоды і стварыць умовы для бесперашкоднай працы незалежных СМІ.

Генеральны сакратар ХДС наведае Менск разам з дэпутаткай бундэстага Мары-Луізай Бек. Ён мае намер сустрэцца таксама з Ігарам Рынкевічам, адвакатам Аляксандра Казуліна, былым палітвязням Сяргеем Скрабцом, шэрагам беларускіх грамадскіх дзеячаў.