Памёр польскі журналіст і пісьменнік Рышард Капусьцінскі :: Хартыя'97 :: Навiны

У Варшаве ва ўзросце 74 гадоў памёр вядомы журналіст, эсэіст, паэт Рышард Капусьцінскі. Па дадзеных BBC News, ён не перанёс аперацыі на сэрцы, а аглядальнік The New York Times лічыць, што прычынай смерці стаў рак, на які Капусьцінскі быў хворы ўжо некалькі гадоў.

Выхадзец з Пінску, Капусьцінскі скончыў Варшаўскі ўніверсітэт і атрымаў ступень па гісторыі. Яго першым месцам службы была моладзевая газета Sztandar Mlodych, адкуль яго звольнілі за смелы рэпартаж пра новы сталеплавільны завод. Пазней за гэты артыкул яму прысудзілі “Залаты крыж”.

У 1962 годзе польскае агенцтва PAP накіравала Капусьцінскага сваім замежным карэспандэнтам у краіны трэцяга свету, і журналіст аб’ездзіў Афрыку, Лацінскую Амерыку і Блізкі Усход. Сярод ягоных знаёмых былі: Патрыс Лумумба, Чэ Гевара, Ідзі Амін і шмат іншых. Пра свае падарожжы ён напісаў шэраг кніг, якія перакладаліся на замежныя мовы, у тым ліку “Імператар” (пра Хайле Саласіе) і “Шахіншах” (пра падзенне дома апошняга афганскага кіраўніка Рэза-шаха Пехлеві). Іх літаратурныя вартасці былі такія высокія, што аўтара неаднойчы высоўвалі на Нобелеўскую прэмію па літаратуры.

У канцы 1970-х Капусьцінскі супрацоўнічаў з уплывовым штомесячным літаратурным часопісам “Культура”.

У 1981 годзе Капусьцінскі далучыўся да руху “Салідарнасць” і пазбавіўся працы ў афіцыйнай прэсе, але ён пісаў эсэ для замежных выданняў, у тым ліку, для амерыканскіх газет і часопісаў.

На расейскую мову перакладзеная прынамсі адна кніга Рышарда Капусьцінскага – “Чорнае дрэва”, перадае Lenta.ru.