Дзяржаўная прапаганда церпіць страты :: Хартыя'97 :: Навiны

У Беларусі вядзецца аптымізацыя працы дзяржаўных сродкаў масавай інфармацыі. Пра гэта заявіў сёння на паседжанні калегіі Міністэрства інфармацыі Рэспублікі Беларусь па выніках працы галіны ў 2006 годзе кіраўнік ведамства Уладзімір Русакевіч.

Паводле яго слоў, у мінулым годзе рэалізаваны праект стварэння на базе газеты “Советская Белоруссия” адзінай выдавецкай структуры па выпуску дзяржаўных масава-палітычных выданняў, накіраваных на замежную аўдыторыю. Да часопіса “Беларусь. Belarus” і газеты “The Minsk Times” з студзеня гэтага года далучылася газета “Голас Радзімы”. Уладзімір Русакевіч упэўнены, што гэты праект будзе паспяховым.

Датычна спраў рэдакцый дзяржаўных рэспубліканскіх выданняў, міністр адзначыў, што на 1 студзеня гэтага года ў параўнанні з 1 студзенем мінулага года наклады знізіліся – з 609,6 тыс. асобнікаў да 582,1 тыс. Самай накладнай застаецца “Советская Белоруссия”, павялічыўся наклад “Народнай газеты”, амаль у тры разы выраслі наклады газеты “Культура” і часопіса “Мастацтва”. Перыядычныя выданні сёння шмат у чым дубліруюць адно аднаго, практыкуюць аналагічныя падыходы ў выбары тэматыкі і ў выбары формаў яе падачы, лічыць кіраўнік ведамства.

Фінансава-эканамічнае становішча некаторых дзяржаўных выданняў застаецца нестабільным. У прыватнасці, складаная сітуацыя сёння ў рэдакцыях газет “Звязда” і “Белорусская нива”. На меркаванне міністра, да такой сітуацыі прывёў неэфектыўны рэдакцыйны мэнэджмент, няўменне планаваць працу з улікам патрабаванняў, якія дынамічна мяняюцца.