Амбасадарка ЗША: У Беларусі няма ўмоў для свабоднага выбару :: Хартыя'97 :: Навiны

У Беларусі няма ўмоў, пры якіх кожны грамадзянін краіны можа пачуць усе існоўныя думкі і зрабіць свой свабодны выбар. Так пракаментавала сітуацыю ў Беларусі амбасадарка ЗША Карэн Сцюарт на сустрэчы 23 студзеня ў Магілёўскай абласной бібліятэцы імя Леніна.

“Мы хацелі б, каб незалежныя сродкі масавай інфармацыі былі свабоднымі, каб былі незалежныя СМІ у дадатак да дзяржаўных, – сказала дыпламатка. – Мы хацелі б, каб грамадскія арганізацыі маглі рэгістравацца і дзейнічаць свабодна. ЗША і Еўразвяз падзяляюць занепакоенасць сітуацыяй у Беларусі”.

К.Сцюарт нагадала, што на мінулым тыдні адбыўся візіт у Беларусь старшыні Парламенцкай Асамблеі Рады Еўропы Рэнэ ван дэр Ліндэна. “Ён імкнуўся да таго, каб наладзіць нейкі дыялог, аднак ён таксама выказаў занепакоенасць палітычным становішчам, наяўнасцю палітвязняў і сітуацыяй з дэмакратычнымі рэформамі. Мы лічым, што ў Беларусі маюць месца выпадкі, калі людзей судзяць па надуманых абвінавачваннях і выносяць прысуды па палітычных матывах. Апеляцыі разглядаюцца вельмі павярхоўна, і самі абвінавачванні выглядаюць дзіўна, бо людзей судзяць за тое, што ў ЗША і Еўропе лічыцца свабодным выказваннем сваёй думкі”, – адзначыла К.Сцюарт.

Амбасадарка ЗША знаходзілася ў Магілёве з мэтай перадачы гуманітарнай дапамогі абласному шпіталю і літаратуры для амерыканскага кутка ў бібліятэцы, паведамляе БелаПАН.