Мілінкевіч аштрафаваны :: Хартыя'97 :: Навiны

За наўмыснае пазапраўнае перасячэнне дзяржаўнай мяжы суд Кастрычніцкага раёна Менска 25 студзеня аштрафаваў лідэра аб’яднаных дэмакратычных сілаў Беларусі Аляксандра Мілінкевіча на 150 базавых велічынь – 4 млн. 650 тыс. рублёў (2.173 даляры ў пераліку на афіцыйны курс).

Як паведаміў БелаПАН прэс-сакратар палітыка Павал Мажэйка, суд адбыўся без удзелу А.Мілінкевіча, які знаходзіцца ў камандзіроўцы ў Вільні. Паводле прэс-сакратара, А.Мілінкевіч не атрымоўваў позву ў суд.

Першае паседжанне суду па гэтай справе адбылося 5 студзеня. Тады складзены ў дачыненні А.Мілінкевіча пратакол аб адміністрацыйным правапарушэнні ў Нацыянальным аэрапорце “Менск” быў адпраўлены на дапрацоўку.

26–29 лістапада 2006 года А.Мілінкевіч знаходзіўся з візітам у Рызе, дзе браў удзел у саміце НАТО. Падчас вылету з Менска памежнікі памылкова паставілі выязны штамп у пашпарт сына палітыка, якога таксама клічуць Аляксандрам. Памылка была заўважаная толькі тады, калі палітык вяртаўся. Памежнікі абвінавацілі А.Мілінкевіча ў наўмысным перасячэнні мяжы па падробленых дакументах.

Па словах П.Можейкі, палітык будзе абскарджваць рашэнне раённага суду.

Артыкул 184-3 Кодэкса аб адміністрацыйных правапарушэннях (пазапраўнае перасячэнне дзяржаўнай мяжы Рэспублікі Беларусь) прадугледжвае пакаранне ў выглядзе штрафу да 300 базавых велічынь (цяпер гэта 9,3 млн. рублёў, або 4,35 тыс. даляраў) або выпраўленчыя працы на тэрмін да двух месяцаў з утрыманнем 20% заробку.