У інтэрнэт-кафе могуць увесці рэгістрацыю наведвальнікаў і ўсталяваць відэакамеры :: Хартыя'97 :: Навiны

Выпадкі распаўсюджвання звестак, якія знеслаўляюць людзей, цераз “сусветную павуціну” налічваюць дзесяткі, калі не сотні, піша “Советская Белоруссия”. Газета не выключае, што з цягам часу ў інтэрнэт-кафе ўвядуць рэгістрацыю наведвальнікаў і ўсталююць у памяшканнях відэакамеры.

Супрацоўнікі аддзела па раскрыцці злачынстваў у сферы высокіх тэхналогій УУС Берасцейскага аблвыканкама скардзяцца, што людзі не спяшаюцца звяртацца за дапамогай у міліцыю, калі іх абразілі ў Інтэрнэце. Тым не менш, на Берасцейшчыне ўжо ўзбудзілі некалькі крымінальных спраў па артыкуле 188 КК “Паклёп”.

– Аднойчы да нас звярнулася студэнтка з Баранавічаў. На адным з порнасайтаў з’явілася яе фота, прозвішча, тэлефон. Замучылі небараку званкамі! – успамінае начальнік так званага аддзела “К” Андрэй Галодка.

Высветлілася, што дзяўчыне “зрабіў ласку” яе былы хлопец – так ён своеасабліва адпомсціў за тое, што яна з ім рассталася. Вартавыя парадку вельмі хутка высветлілі, хто “павесіў” фота і суправадзіў яго подпісамі. Ужо адбыўся суд. Мсцівы кавалер аштрафаваны на 1.015.000 рублёў. Другая справа пакуль расследуецца, але сутнасць тая самая: помста, Інтэрнэт, дзяўчына…

– Неяк на электронную паштовую скрыню аддзела прыйшоў ліст з паклёпам на нашага супрацоўніка. Аўтара мы знайшлі. Крымінальную справу супрацоўнік ініцыяваць не стаў, прабачыў крыўдніку. Але да адміністрацыйнай адказнасці хулігана ўсё-ткі прыцягнулі, каб надалей такім не займаўся, – распавядае Андрэй Галодка.

Знайсці паклёпнікаў, якія ўзялі ў памагатыя Інтэрнэт, складана, але магчыма. І не выключана, што з часам колькасць такіх злачынстваў будзе расці, берасцейскія сышчыкі просяць уладальнікаў інтэрнэт-кафе весці рэгістрацыю наведвальнікаў і ўсталёўваць у памяшканнях відэакамеры. Гэта выключыць спакусу “пахуліганіць” з чужога кампутара, падагульняе “Советская Белоруссия”.