Партыю апазіцыйных камуністаў могуць закрыць :: Хартыя'97 :: Навiны

У Беларусі прызначаная дата паседжання аб разглядзе пазову аб прыпыненні дзейнасці Партыі камуністаў Беларусі (ПКБ). Гэту справу разгледзіць Вярхоўны суд краіны, паведамілі “Інтэрфаксу” ў судзе. Разгляд пазову пачнецца 5 лютага. У Вярхоўным судзе ўдакладнілі, што пазоў аб прыпыненні дзейнасці ПКБ ініцыяваны Міністэрствам юстыцыі Беларусі.

Раней у Мінюсце заявілі, што падчас праверак дзейнасці ПКБ міністэрства юстыцыі неаднойчы запытвала ў партыі дакументы аб колькасці яе сяброў, аднак неабходныя дакументы не былі прадстаўленыя, за што партыі Міністэрствам юстыцыі было вынесенае пісьмовае папярэджанне. У вызначаны ў пісьмовым папярэджанні тэрмін запытаныя Міністэрствам юстыцыі дакументы зноў не былі прадстаўленыя, канстатавалі ў Мінюсце.

“Міністэрства юстыцыі папярэджвала кіраўніцтва партыі пра магчымыя наступствы супрацьпраўнай дзейнасці. Аднак партыя працягвае ігнараваць заканадаўства і не робіць ніякіх дзеянняў, якія сведчылі б пра вяртанне яе ў межы прававога поля”, – адзначылі ў прэс-службе Мінюста.

З свайго боку першы сакратар ПКБ Сяргей Калякін адзначыў, што, на яго думку, “справа аб прыпыненні дзейнасці партыі павінна быць спыненая, бо не мае пад сабой юрыдычных падстаў”. Паводле яго слоў, у яго ёсць ліст з Міністэрства юстыцыі, дзе гаворыцца, што “з колькасцю сяброў у партыі ўсё ў парадку”.

У той час лідэр партыі адзначае, што “падрыхтаваны да ўсялякага павароту падзей” падчас судовага працэсу.