Упраўленне справамі прэзідэнта дало памяшканне БХК :: Хартыя'97 :: Навiны

Галоўнае гаспадарчае ўпраўленне Упраўлення справамі прэзідэнта падоўжыла дамову арэнды памяшкання з рэспубліканскім грамадскім аб’яднаннем “Беларускі Хельсінкскі Камітэт”. Пра гэта прэс-цэнтру Хартыі’97 паведаміла старшыня БХК Таццяна Працька, якая сёння сустрэлася з выканаўцай абавязкаў начальніка ГГУ Упраўлення справамі прэзідэнта Міхаілам Бяляевым.

Па словах праваабаронцы, дамова арэнды памяшкання па адрасе вул. Карла Лібкнехта, 68 у Менску падоўжаная на год, і цяпер у арганізацыі ёсць юрыдычны адрас і ёй не пагражае ліквідацыя.

“Мы мелі гутарку з в.а. кіраўніка ГГУ Упраўлення справамі прэзідэнта спадаром Бяляевым. Ён сказаў, што, магчыма, мы не самыя лепшыя арандатары, але дамова з намі падаўжаецца яшчэ на год”, – паведамляе Таццяна Працька.

Прычына падаўжэння дамовы з БХК, на думку праваабаронцы, – заявы ў абарону арганізацыі, зробленыя гэтымі днямі Еўрапейскім Звязам і Дзяржаўным дэпартаментам ЗША.

“Заявы Еўразвяза і ЗША маюць вельмі вялікае значэнне. Мы ўдзячныя ўсім, хто нас падтрымаў”, – заявіла Таццяна Працько.

Нагадаем, што ў снежні 2006 года Галоўнае гаспадарчае ўпраўленне Упраўлення справамі прэзідэнта Рэспублікі Беларусь паведаміла РГА “Беларускі Хельсінкскі Камітэт” (БХК) пра скасаванне кантракта на арэнду офіснага памяшкання і загадала вызваліць яго да 20 студзеня 2007 года.

У лістападзе мінулага года суд Менска пастанавіў канфіскаваць апісаную маёмасць Беларускага Хельсінкскага Камітэта. Праваабаронцаў абвінавацілі ў няплаце падаткаў у межах праграмы дапамогі ТАСІС.

Акрамя таго, у Вярхоўным судзе адноўленая справа (ініцыяваная міністэрствам юстыцыі) аб спыненні дзейнасці камітэта, які ў мінулым годзе адзначыў сваё дзесяцігоддзе.

Дзеянні беларускіх улад у дачыненні БХК асудзіла міжнародная праваабарончая супольнасць.