З дзяржпрадпрыемстваў звальняюць сяброў незалежных прафсаюзаў :: Хартыя'97 :: Навiны

Адміністрацыя УП “Лёс” горада Барань (Віцебская вобласць) вырашыла збавіцца ад незалежнага прафсаюза і звальняе яго актывістаў, паведамляе www.praca-by.info. 30 студзеня чатыры сябры Свабоднага прафсаюза металістаў (СПМ) атрымалі паведамленне пра тое, што з 1-га сакавіка яны будуць звольненыя ў сувязі з заканчэннем тэрміна кантракту.

Як паведаміў старшыня СПМ Васіль Леўчанкаў, усе кандыдаты на звальненне – высокакваліфікаваныя працаўнікі, якія не маюць ніякіх спагнанняў. У прафсаюзе ўпэўненыя, што іх хочуць звольніць за тое, што яны належаць да СПМ.

Прафсаюз накіраваў на адрас дырэктара афіцыйны пратэст супраць дыскрымінацыі сяброў СПМ па прафсаюзнай прыналежнасці. 31 студзеня старшыня Беларускага Кангрэса дэмакратычных прафсаюзаў Аляксандр Ярашук узніме гэтае пытанне на паседжанне Нацыянальнага Савета па працоўных і сацыяльных пытаннях.

“Я упэўнены, што дырэктар хоча збавіцца ад сяброў СПМ і расправіцца з нашай арганізацыяй. Інакш я не бачу ніякі логікі ў яго рашэннях. Сяргей Макасевіч – малады спецыяліст і ў літаральным сэнсе незаменны супрацоўнік. Прэтэнзій да працы астатніх у кіраўніцтва таксама ніколі не было. І усё гэта адбываецца на фоне таго, што ўрад у апошні час заяўляе пра тое, што ён выконвае рэкамендацыі Міжнароднай арганізацыі працы па знішчэнні парушэнняў правоў незалежных прафсаюзаў”, – гаворыць Васіль Леўчанкаў.