Еўропа патрабуе ад Лукашэнкі выканання ўмоў :: Хартыя'97 :: Навiны

Паўнавартасныя палітычныя стасункі з Беларуссю магчымыя толькі пасля таго, як краіна выканае пэўныя ўмовы, адзначыў 31 студзеня ў інтэрв’ю БелаПАН генеральны сакратар Хрысціянска-дэмакратычнага саюза (ХДС) Нямеччыны Рональд Пофала.

Нямецкі палітык падкрэсліў, што Еўразвяз патрабуе, у першую чаргу, вызвалення ўсіх палітычных зняволеных у краіне, забеспячэння свабоды слова і раўнапраўнага доступу да СМІ для прадстаўнікоў усіх палітычных партый.

“Ніякай працы з Беларуссю не можа быць, пакуль не выкананыя дадзеныя ўмовы”, – сказаў Р.Пофала. Пры гэтым ён падкрэсліў, што ЕЗ і Нямеччына, як яго дзейны старшыня, зацікаўленыя ў дэмакратычных зменах у Беларусі.

Р.Пофала таксама адзначыў, што дэмакратычная апазіцыя ў Беларусі вядзе “вельмі актыўную працу”. “Яе падтрымліваюць усе шырэйшыя пласты насельніцтва”, – сказаў генеральны сакратар ХДС. Па яго словах, імкненне да дэмакратычных зменаў у Беларусі стала “сувязнай сілай” для апазіцыі.

Нагадаем, учора Р.Пофала сустракаўся ў Берліне з лідэрам аб’яднаных дэмакратычных сілаў Беларусі Аляксандрам Мілінкевічам. Паводле інфармацыі беларускага палітыка, яны абмяркоўвалі праблемы беларускай апазіцыі, выбараў у Беларусі, беларуска-расейскага нафтагазавага крызісу, а таксама перспектывы супрацоўніцтва паміж Нямеччынай і Беларуссю.