Пуцін: «Мы не абавязаныя субсідаваць эканомікі іншых краін» :: Хартыя'97 :: Навiны

Прэзідэнт Расеі Уладзімір Пуцін аспрэчвае сцвярджэнне пра тое, што Расея выкарыстоўвае эканамічныя рычагі для дасягнення знешнепалітычных мэтаў. “Нам увесь час навязваюць тэзіс пра тое, што Расея выкарыстоўвае эканамічныя рычагі для дасягнення знешнепалітычных мэтаў – гэта не так”, – адзначыў У.Пуцін на прэс-канферэнцыі ў Крамлі. “Расейская Федэрацыя цалкам і ў поўным аб’ёме заўсёды выконвала і збіраецца выконваць у будучыні ўсе свае абавязальніцтвы, але мы не абавязаныя субсідаваць эканомікі іншых краін у вялізных памерах, супастаўных з іх бюджэтамі”, – падкрэсліў расейскі прэзідэнт, відавочна намякаючы Беларусь.

Па словах Пуціна, гэтага не робіць ніхто. “Чаму гэтага патрабуюць ад нас?” – сказаў прэзідэнт Расеі, перадае “Інтэрфакс” .

“Тое, што мы робім і тое, пра што мы дамаўляемся з транзітнымі краінамі, накіраванае найперш на забеспячэнне інтарэсаў асноўных спажыўцоў”, – падкрэсліў У.Пуцін.

Ён запэўніў, што эксперты ў дадзенай сферы “гэта выдатна разумеюць”. “Уявіце сабе, што з Украінай мы штогод падпісвалі кантракт як на пастаўку (энергарэсурсаў) ва Ўкраіну, так і на транзіт у Заходнюю Еўропу, і заўсёды спажыўцы ў Заходняй Еўропе залежалі ад таго, дамовімся мы з нашымі ўкраінскімі партнёрамі ці не дамовімся”, – сказаў прэзідэнт.

Па яго словах, цяпер Расея стварыла рынкавыя ўмовы транзіту энергарэсурсаў.

“Трэба сказаць нам дзякуй, але замест гэтага мы бачым нядобрасумленнае стаўленне да інтэрпрэтацыі тых падзей, што адбываюцца. І, вядома, гэта робяць нядобразычліўцы Расейскай Федэрацыі – я не кажу пра тое, што гэта робіцца ў дзяржаўным маштабе – але такія сілы ёсць”, – падкрэсліў У.Пуцін.

Ён назваў нядобразычліўцамі тых, хто неаб’ектыўна і няправільна піша пра сітуацыю ў гэтай сферы.