Беларусь назвала цану зямлі пад расейскімі трубамі :: Хартыя'97 :: Навiны

У Беларусі плануюць усталяваць плату за зямлю з ляснога фонду, што адведзена пад трубаправоды, лініі электраперадач і іншыя лінейныя аб’екты. Як паведаміў сёння журналістам старшыня беларускага Дзяржаўнага камітэта па маёмасці Георгій Кузняцоў, распрацаваны адпаведны праект прэзідэнцкага ўказа, які знаходзіцца на ўзгадненні ва ўрадзе. Па яго словах, згодна з гэтым дакументам беларускія прадпрыемствы – уладальнікі лінейных аб’ектаў будуць плаціць падатак за замацаваную за імі лясную зямлю.

Замежным фірмам зямля з ляснога фонду, па якой, напрыклад, праходзіць газаправод, будзе перададзеная ў арэнду. І, натуральна, будзе спаганяцца арэндная плата. Аднак, па словах Кузняцова, “ніхто нікога не распране – сумы будуць капейкавыя”. Мяркуюць, што краіна будзе атрымоўваць ад гэтага каля $8 млн. у год. У тым ліку падатак на зямлю з беларускіх кампаній складзе не на шмат больш за $3 млн., а арэндная плата з замежных фірм – каля $5 млн.

Замежныя фірмы – гэта расейскія кампаніі, бо менавіта яны валодаюць на тэрыторыі Беларусі ўчасткам газаправода Ямал–Еўропа, а таксама нафтапрадуктаправодамі.

Увядзенне падатку Кузняцоў папрасіў не звязваць з апошнім рознагалоссем Беларусі з Расеяй і растлумачыў, што яшчэ ў жніўні 2006 года пры ўзгадненні пытанняў адводу зямельных участкаў ляснога фонду была пастаўленая ўмова выдачы ахоўнай зоны ў карыстанне альбо ў арэнду, перадае ПРАЙМ-ТАСС.