Барыс Нямцоў: «Расея толькі ідзе па слядах Беларусі» :: Хартыя'97 :: Навiны

Расея ў частцы абмежавання грамадзянскіх свабодаў ідзе па шляху Беларусі, хоць трэба браць прыклад не з Менска, а з Кіева. Пра гэта піша Барыс Нямцоў ва ўкраінскай газеце “Дело”. “Я згодны з высновай Міжнароднай праваабарончай арганізацыі Freedom House, якая ў сваім штогадовым дакладзе “Аб стане свабоды ў свеце” назвала Расею нявольнай краінай. Але не згодны з тым, што Расеі паставілі мінімальна магчымы бал за ўзровень грамадзянскіх свабодаў і, такім чынам, прыраўнялі нас да Кубы, Лівіі і Паўночнай Карэі, Беларусі. Тое, што Расея краіна нявольная, зразумела. Але яна – не Паўночная Карэя, інакш я цяпер каментары даваць бы не змог. Расея ідзе па слядах Беларусі, але мы яшчэ не Беларусь, не Узбекістан і не Туркменістан”, – піша Нямцоў.

У сваім артыкуле Барыс Нямцоў нагадвае, “за гады кіравання таварыша Пуціна былі забітыя больш за 20 журналістаў”.

“Пуцін разглядае журналістаў як сваіх асабістых ворагаў. Жыццё іх падвяргаецца пагрозам і небяспецы. Гэта ўсё так, мы рухаемся ў змрочны бок Беларусі, але мы яе яшчэ не дасягнулі. Ад Беларусі мы адстаём гадоў на пяць”, – працягнуў Нямцоў.

“З Пуціным краіна будзе каціцца ўніз і надалей. Трэба дамагчыся сумленных прэзідэнцкіх выбараў і дэмакратычным шляхам абраць уладу. Трэба вельмі акуратна дэмантаваць гэтую “кдб-эшную” сістэму, якую ён пабудаваў і вярнуць свабоду слова людзям, свабоду дэманстрацый, сумленныя выбары, дазволіць апазіцыі спакойна дзейнічаць. Трэба браць прыклады не з Менска, а з Кіева”, – перакананы сябра СПС.