Дэфіцыт свабоднай прэсы ў Бабруйску :: Хартыя'97 :: Навiны

Бабруйскі філіял ААТ “Магілёўсаюздрук” адмовіўся падоўжыць дамову аб рознічнай рэалізацыі грамадска-палітычнай газеты “Бобруйский курьер”. У вуснай форме пра гэта рашэнне выканаўцу абавязкаў галоўнага рэдактара газеты Анатолю Санаценку паведаміла начальніца бабруйскага філіяла ААТ “Магілёўсаюздрук” Т.І.Бежалева.

Фармальная падстава адмовы ў падаўжэнні дамовы – нізкая рэалізацыя газеты. На працягу 16 гадоў газета рэалізоўвалася ў шапіках “Саюздруку” і ніколі не станавілася ініцыятарам якіх-небудзь канфліктаў з гэтай арганізацыяй. Аднак ніколі “Бобруйский курьер” не абыходзіў увагай нават самыя малыя падзеі ў грамадскім і палітычным жыцці горада, паведамляе арганізацыя “Праваабарончы альянс”.

Адно з пацверджанняў таму – асвятленне галадоўкі пратэсту прафсаюзнай актывісткі Алены Захожай на ААТ “Белшына”. “Бобруйский курьер” стаў адзінай газетай у горадзе, на чыіх старонках з’явілася інфармацыя пра галадоўку. І такіх прыкладаў мноства. Гэта дынамічнае, незалежнае выданне, якое ўвесь час развіваецца. Нядаўна газета цалкам змяніла яшчэ і знешні выгляд, чым яшчэ больш прыцягнула як чытачоў, так і рэкламадаўцаў. Так што пра “невыгоднасць рэалізацыі” не можа быць і гаворкі. Хутчэй, гаворка пра “няправільнасць” грамадска-палітычнай пазіцыі газеты.

Сёння ААТ “Магілёўсаюздрук” – манапаліст у галіне “беспраблемнай” рэалізацыі друкаваных выданняў у Бабруйску. Такім чынам, гэтая раптоўная адмова не што іншае як эканамічная пятля на шыі “Бобруйского курьера”.