«Малады Фронт»:14 лютага акцыя адбудзецца :: Хартыя'97 :: Навiны

“Нягледзячы на рэпрэсіі, акцыя, прымеркаваная да Дня святога Валянціна, пройдзе ў традыцыйным фармаце”, – паведаміў 5 лютага падчас прэс-канферэнцыі адзін з лідэраў “Маладога Фронту” Барыс Гарэцкі. Па яго словах, 14 лютага адбудзецца традыцыйная, дзесятая, акцыя, прысвечаная святкаванню Дня святога Валянціна пад дэвізам “Беларусь – у Еўропу”. Заяўка на яе правядзенне ўжо пададзеная ў Менгарвыканкам.

Акцыя пачнецца 14 лютага а 18 гадзіне на плошчы Свабоды. На працягу дня моладзевыя актывісты, як і ў папярэднія гады, маюць намер разносіць віншаванні з Днём святога Валянціна ў амбасады і прадстаўніцтвы еўрапейскіх дзяржаў у Менску.

“Калі гэты дзень зноў адзначыцца масавымі затрыманнямі або моладзевыя актывісты будуць затрымоўвацца прэвентыўна, то рыторыка кіраўніцтва Беларусі з нагоды збліжэння з Еўропай будзе бачная як на далоні. Гэта стане яшчэ адным сігналам Еўропе пра тое, што беларускія ўлады ніяк не збіраюцца збліжацца з Еўрапейскім Звязам, пра што ў апошні час неаднаразова паведамляў Лукашэнка. Гэта таксама пакажа, што ўлады не збіраюцца выконваць умовы Еўразвяза па дэмакратызацыі Беларусі і адмаўляюцца ад прапановаў дапамогі з боку ЕЗ”, – адзначыў Б.Гарэцкі.

Нагадаем, 27 актывістаў арганізацыі “Малады Фронт” – ініцыятары правядзення акцыі – былі затрыманыя ўвечары 4 лютага на адной з прыватных кватэр Менска. Там яны праводзілі паседжанне цэнтральнай рады арганізацыі, на якім планавалася абмеркаваць і падрыхтоўку да святкавання Дня святога Валянціна.