У Менску адкрыецца амбасада Венесуэлы :: Хартыя'97 :: Навiны

Амбасада Венесуэлы неўзабаве адкрыецца ў Менску. Пра гэта паведаміў карэспандэнту БЕЛТА Часовы Павераны ў справах Баліварыянскай Рэспублікі Венесуэла ў Беларусі Амерыка Дыяс Нуньес. Мяркуюць, што адкрыццё амбасады адбудзецца ў першым квартале 2007 года.

Па ацэнцы дыпламата, у апошні час узровень стасункаў паміж дзвюма краінамі істотна падвысіўся. “Ёсць вялікія перспектывы і рэальныя ўмовы для пашырэння эканамічнага, культурнага і палітычнага ўзаемадзеяння. Венесуэльскі ўрад лічыць супрацоўніцтва з Беларуссю ў шмат якіх абласцях стратэгічным”, – падкрэсліў Амерыка Дыяс Нуньес.

Як адзначыў Часовы Павераны, Беларусь і Венесуэла маюць падобныя погляды адносна мадэлі сацыяльнага развіцця і неабходнасці пабудовы шматпалярнага свету.

4 лютага 2007 года споўнілася 10 гадоў з дня ўсталявання дыпламатычных стасункаў паміж Беларуссю і Венесуэлай.

Па інфармацыі Міністэрства замежных спраў, аснову беларускага экспарту ў Венесуэлу ў 2006 годзе склалі пастаўкі калійных удабрэнняў і грузавых аўтамабіляў. У ліпені 2006 года адбыўся афіцыйны візіт у Беларусь прэзідэнта Баліварыянскай Рэспублікі Венесуэла Уга Чавеса, падчас якога дасягнутыя важныя дамоўленасці аб стварэнні стратэгічнага альянсу дзвюх краін, сумеснай рэалізацыі праектаў у гандлёва-эканамічнай і іншых сферах.