Лукашэнка надзяліў сына вялікімі паўнамоцтвамі ў Савеце бяспекі :: Хартыя'97 :: Навiны

У канцы мінулага тыдня прэс-служба Аляксандра Лукашэнкі паведаміла пра крок кіраўніка дзяржавы па дэбюракратызацыі ўласнай адміністрацыі. Згодна з Указам кіраўніка дзяржавы колькасць супрацоўнікаў яго адміністрацыі скарочаная на пяць чалавек. Аднак калі быць больш дакладнымі, то Адміністрацыя прэзідэнта скарацілася на пяць чалавек з адначасовым павелічэннем на два службоўцы штата Савета бяспекі Рэспублікі Беларусь. Два супрацоўніка Адміністрацыі прэзідэнта перададзеныя ў Савет бяспекі для забеспячэння дзейнасці Віктара Лукашэнкі, піша сёння «Ежедневник».

Нагадаем, што памочнік прэзідэнта па нацыянальнай бяспецы сын Аляксандра Лукашэнкі Віктар афіцыйна ўведзены ў склад Савета бяспекі 5 студзеня 2007 года згодна з Указам прэзідэнта №3. Ніякіх каментараў ад прэс-службы прэзідэнта з нагоды прызначэння не было. Ніхто таксама не растлумачыў, якія абавязкі будзе выконваць сын прэзідэнта ў Савеце бяспекі. Неафіцыйныя каментары круціліся вакол наступных меркаванняў: альбо Аляксандр Лукашэнка паволі пачаў рыхтаваць сабе замену, альбо больш нікому, акрамя ўласнага сына, не давярае. І вось цяпер з’явіліся ўскосныя пацверджанні, што Віктар Лукашэнка ў Савеце бяспекі не будзе іграць ролю статыста.

Указам прэзідэнта №58 ад 30.01.2007 г., згодна з якім Адміністрацыя прэзідэнта скарочаная на пяць чалавек, двое з скарачэнцаў пераведзеныя ў “Дзяржаўны сакратарыят Савета Бяспекі Рэспублікі Беларусь для забеспячэння дзейнасці памочніка Прэзідэнта Рэспублікі Беларусь па нацыянальнай бяспецы”. На падставе гэтых звестак можна зрабіць дакладную выснову: Віктар Лукашэнка не з’яўляецца радавым сябрам Савета бяспекі, а ўваходзіць у яго сакратарыят і, хутчэй за ўсё, будзе выконваць ролю “шэрага кардынала” пры Віктару Шэймане.

Цікава, што ва ўказе №58 ёсць п. 2.2, які ў апублікаванай версіі гучыць так: “Для службовага карыстання”. Магчыма, што менавіта гэтым пунктам вызначаныя пэўныя абавязкі Віктара Лукашэнкі, якія не прызначаныя для астатняга асяродку.