Суд над Лукашовым прызначаны на 15 лютага :: Хартыя'97 :: Навiны

Суд над Кастусём Лукашовым, братам грамадскага актывіста Вячаслава Сіўчыка, прызначаны на 15 лютага. Пра гэта БелаПАН паведаміў В.Сіўчык. Па яго словах, працэс пройдзе ў будынку суду Ленінскага раёна Менска і пачнецца ў 10 гадзін 30 хвілін.

“Я звяртаюся да аднадумцаў і паплечнікаў з просьбай падтрымаць нашу сям’ю, Кастуся”, – сказаў В.Сіўчык.

“Я ўспрымаю справу Кастуся Лукашова як выключна палітычную. Галоўная мэта гэтай справы, на мой погляд, гэта дыскрэдытацыя Беларусі ў вачах сусветнай, і найперш еўрапейскай, грамадскасці. З’яўленне яшчэ аднаго палітвязня – яшчэ адзін удар па іміджы Беларусі”, – лічыць В.Сіўчык.

Ён таксама паведаміў, што сям’я К.Лукашова і ён сам персанальна “катэгарычна асуджаюць” дзеянні ўлад у дачыненні актывістаў моладзевага дэмакратычнага руху Змітра Хведарука і Алега Корбана, якія цяпер знаходзяцца ў следчым ізалятары КДБ. “Гэтае злачынства нават не супраць моладзі – гэтае злачынства супраць нацыі. Маладыя людзі ў ХХІ стагоддзі не павінны арыштоўвацца па законах стагоддзя ХІХ”, – адзначыў В.Сіўчык.

Нагадаем, К.Лукашоў быў затрыманы 19 снежня. Паводле наяўнай інфармацыі, яму інкрымінуецца наезд на аўтамабілі на супрацоўніка міліцыі 29 сакавіка мінулага года, калі ён забіраў В.Сіўчыка з аддзялення хірургіі 3-га клінічнага шпіталя Менска. У той дзень невядомыя людзі з пасведчаннямі супрацоўнікаў МУС спрабавалі затрымаць грамадскага актывіста пасля яго выпіскі з шпіталя нібыта за дробнае хуліганства, аднак з дапамогай брата Сіўчыку ўдалося знікнуць.