Лукашэнка нават не заехаў да жонкі і цёшчы :: Хартыя'97 :: Навiны

У мінулую нядзелю Аляксандр Лукашэнка вырашыў зазірнуць на радзіму – у Шклоўскі раён. У вёсцы Вялікі Межнік, што ў дзесяці хвілінах ходу ад Александрыі, жыве яго цёшча – Алена Фёдараўна Жалняровіч, аднак, як піша «КП в Беларуси», Лукашэнка не заехаў ні да яе, ні да сваёй жонкі Галіны Радзівонаўны.

Пра тое, што зяць прыязджае ў родныя мясціны, цёшча даведалася ад унука Віктара.

– Унук патэлефанаваў: “Бабуля, бацька сказаў, што заедзе”. Я ўсё чакала-чакала, а ён тут усё на хаду, усё бягом. Абмежаваны ў часе быў, не паспеў нават у школу зайсці, – распавяла Алена Фёдараўна. – Не пабачыўся ні з кім. У Рыжковічы да Галі нават не заехаў (у Рыжковічах жыве Галіна Радзівонаўна Лукашэнка, жонка прэзідэнта). Але што рабіць, праца такая. Нічога страшнага, на Новы год бачыліся. Месяц таму ўсяго.

– Ён заязджаў?

– Не, мы былі ў Менску. Новы год разам сустракалі.

– Калі не сакрэт, што вы падарылі Аляксандру Рыгоравічу на Новы год?

– Ну, што мы яму падарым? З вёскі прывезлі каўбасу свойскую. Ён любіць крывяную каўбасу. Усякія прысмакі на стол.

Цёшчыны бліны Лукашэнка прамяняў на працу – правяраў, як ідуць справы ў аграмястэчку Александрыя. Найперш зірнуў на гаспадарку з борта гелікопцера, а потым спусціўся на зямлю.

Два гады таму Александрыя, дзе вырас Лукашэнка, памірала. Жылі тут пераважна пенсіянеры. А у 2005 годзе шэфства над мясцовай гаспадаркай “Александрыйская” ўзяў Нацбанк Беларусі. З такімі шэфамі і Александрыя, і суседняя вёска Вялікі Межнік заззялі проста як золатавалютны запас краіны. Як на дражджах тут выраслі пяць дзесяткаў новенькіх катэджаў, крытых чарапіцай, новенькі фізкультурна-аздараўленчы комплекс з басейнам і джакузі, медычная амбулаторыя, Дом бытавых паслуг, цэнтр культуры і вольнага часу, лазнева-пральны камбінат, бібліятэка, Цэнтр культуры і вольнага часу, кафэ-сталовая. Абнавілася і школа, якую скончыў Лукашэнка.