Лукашэнка зрабіў заявы пра супрацоўніцтва Беларусі з Расеяй і Еўразвязам :: Хартыя'97 :: Навiны

Аляксандр Лукашэнка 6 лютага даў інтэрв’ю інфармацыйнаму агенцтву “Рэйтэр”. Падчас інтэрв’ю беларускі кіраўнік зрабіў шэраг важных заяў наконт супрацоўніцтва Беларусі з Расеяй і з Еўрапейскім Звязам, паведаміла яго прэс-служба.

Пытанні, адрасаваныя Аляксандру Лукашэнку, былі пра энергетычны канфлікт Беларусі і РФ, яго магчымыя наступствы, а таксама пра асабістыя ўзаемаадносіны кіраўнікоў дзвюх дзяржаў. Лукашэнка прагназаваў далейшае развіццё беларуска-расейскага ўзаемадзеяння. Пры гэтым беларускі кіраўнік пацвердзіў настроенасць краіны на будаванне саюза з Расеяй выключна на раўнапраўных умовах, адзначае прэс-служба.

Лукашэнка распавёў пра сваё бачанне асаблівасцяў сацыяльна-эканамічнай мадэлі Беларусі, пра “сакрэт” эканамічнага поспеху краіны, а таксама пра пункт гледжання на пытанні захавання правоў чалавека, свабоды прэсы, стасункаў улады і апазіцыі, стаўлення грамадства да прадстаўнікоў апазіцыйных структур.

Рэйтэр – адно з найбуйнейшых міжнародных агенцтваў навін, мае звыш 190 бюро па ўсім свеце. Заснаванае ў Лондане ў 1851 годзе.

За апошнія гады карэспандэнты “Рэйтэр” падрыхтавалі інтэрв’ю з прэзідэнтамі Украіны, Грузіі, Азербайджана, прэм’ер-міністрам Украіны, міністрамі замежных спраў Беларусі і Грузіі, а таксама з кіраўнікамі цэнтральных банкаў, палітыкамі, эканамістамі, кіраўнікамі найбуйнейшых прамысловых кампаній і фінансавых груп шэрагу краін СНД.

З навінамі “Рэйтэр” (у тым ліку і праз іншыя СМІ) штодня знаёмяцца звыш 1 млрд. чалавек.