«У маёй жыроўцы нерэальныя сумы!» :: Хартыя'97 :: Навiны

Чытач “КП” Сяргей Сурэнскі прынёс у рэдакцыю некалькі сваіх жыровак за 2006 год: “Я жыву ў Менску, у доме па вул. Будаўнікоў, 8. Некаторыя лічбы, якія мы з суседзямі бачылі ў нашых квітанцыях, падаваліся нам проста астранамічнымі! Напрыклад, у кастрычніку за падаграванне воды мне налічылі аплату за 40 кубоў, а гэта ў дзесяць разоў больш, чым звычайна! Я, звычайна, спажываю ў месяц каля чатырох кубоў вады. Пэўна, такі неверагодны аб’ём мог бы атрымацца, калі б я наогул не выключаў кран! Прычым гэтая гісторыя паўтаралася не адзін раз. Мы з суседзямі звярталіся ў ЖЭС, але нам адказвалі, што дадзеныя здымалі з лічыльніка, і ніякіх парываў трубаправода ў гэтыя месяцы не было...”

Сапраўды, у жыроўцы ў радку “за падаграванне воды” мы ўбачылі дзіўныя лічбы:
Жнівень – 4 м куб. Колькасць Гкал – 0,10435. Сума – 2 890 руб.
Верасень – 28 м куб. Колькасць Гкал – 0,20388. Сума – 6 618,01 руб.
Кастрычнік – 40,8 м куб. Колькасць Гкал – 0,53722. Сума – 17 438,32 руб.
Лістапад – 2,9 м куб. Колькасць Гкал – 0,20202. Сума – 6 557,63 руб.

Каб разабрацца, адкуль узяліся дзіўныя лічбы, мы патэлефанавалі ў ЖЭС № 93.

Дырэктар ЖЭС № 93 Мікалай Іванавіч БОЙКА: “Вядома, адзін чалавек не мог спажыць столькі вады. Але дадзеныя былі разлічаныя правільна”.

– Гэта стары дом з аднатрубнай сістэмай. Гэта значыць, для таго каб пайшла гарачая вада, яе трэба доўга зліваць: спачатку з гарачага крана цячэ халодная вада, потым ледзь цёплая, потым гарачая. Але, вядома, гэта не адзіная прычына... У гэтым доме была праблема, яшчэ ўвесну. Мы тады абышлі ўсе кватэры, перамовіліся з людзьмі. Растлумачылі, што неабходна ўсталёўваць індывідуальныя прыборы ўліку гарачай і халоднай вады. Сёння лічыльнікі ёсць ужо амаль ва ўсіх кватэрах.

– А чаму ўсё-ткі былі перапады?

– Месяц на месяц не прыходзіцца. Улетку, калі людзі на дачах, выдаткі вады меншыя. У кастрычніку, калі людзі ставяць закаткі – большыя. Бываюць такія скокі.

– Але 40 кубоў – гэта занадта шмат!

– У нас прыборы спраўныя, апламбаваныя, тут пытанняў няма. Мы з гэтым жыхаром не раз мелі стасункі, гаварылі: давайце ўсталёўваць прыбор уліку. Не такая дарагая гэтая паслуга – 190–200 тысяч, тым больш што гэта можна зрабіць у растэрміноўку.

– Вы лічыце, што адзін чалавек мог спажыць 40 кубоў вады?

– Не, натуральна, ён столькі не спажыў. У гэтым доме было некалькіх даўжнікоў па камунальных плацяжах, мы да іх з міліцыяй прыходзілі. Суседзі казалі, што ўвесь час быў чутны шум у адной з кватэр, што там вада ўвесь час лілася. Ведаеце, колькі за суткі можа выліцца? Знайсці іх немагчыма – убачаць у акно, што мы прыязджаем, і зачыняюцца, не пускаюць. А у выніку агульныя паказчыкі дзеляцца на ўсіх.

Трэба ставіць лічыльнікі. Тады кожны будзе плаціць за сябе.

Зараз Сяргей будзе ўсталёўваць лічыльнік:

– У лістападзе я падаў заяву на ўсталяванне лічыльніка, і толькі праз два месяцы, у студзені, атрымаў каштарыс на яго ўсталяванне з ЖЭС. Але пераразлік мне так і не зрабілі.

Як пракантраляваць сумы ў жыроўках?

Зразумець адно аднаго з ЖЭС або разлікова-даведкавым цэнтрам (РДЦ) не заўсёды магчыма і ў іншых людзей. Каб пазбегнуць непрыемнасцяў і дамагчыся справядлівасці, трэба ведаць некалькі правіл:

1. Прымайце ўдзел у здыманні дадзеных групавых прыбораў уліку цяпла і вады разам з супрацоўнікамі жыллёвых службаў.

– Так можна пракантраляваць сапраўднасць дадзеных, параметры цепланосбіта на вашым доме або цеплавузле, – распавёў намеснік галоўнага інжынера УЖХ Менгарвыканкама Валеры Ляўковіч. – Але рабіць гэта лепш не ўсім пад’ездам! Жыхары маюць права вылучыць аднаго адказнага чалавека, які будзе прадстаўляць іх інтарэсы. Кожны месяц ён зможа ўдзельнічаць пры здыманні дадзеных з лічыльнікаў і ўпэўніцца ў тым, што яны дакладныя.

2. Перамовы з ЖЭС весці лепш пісьмова

Калі вы знайшлі ў жыроўцы лічбы, у правільнасці якіх вы сумняваецеся, і вусны зварот па тэлефоне ў ЖЭС або РДЦ не даў вынікаў, звяртайцеся за тлумачэннямі пісьмова. У ЖЭС або РДЦ, у сваю чаргу, абавязаныя будуць даць вам пісьмовы адказ.

3. Калі адказ з ЖЭС вам падаецца непераканаўчым і дамагчыся пераразліку вы не здолелі, звяртайцеся ў вышэйшую арганізацыю – ЖРЭО свайго раёна – у пісьмовай форме. Калі і там вам не дапамогуць, тэлефануеце на "гарачую лінію" УЖХ Менгарвыканкама. Нумар тэлефона: 227 49 46.

4. Усталёўвайце індывідуальныя лічыльнікі – прыборы ўліку выдаткаў халоднай і гарачай вады. У гэтым выпадку вы сапраўды будзеце ведаць, што плаціце толькі за спажытую ваду.

5. Пракантраляваць правільнасць тарыфаў у жыроўцы можна. Трэба патэлефанаваць у службу даведак 075 або зазірнуць на сайт разлікова-вылічыльнага цэнтра УЖХ Менгарвыканкама www.komplat.by.

"КП" в Беларуси"