Расея ўчыніла Беларусі транзітную блакаду :: Хартыя'97 :: Навiны

Міністэрства транспарту РФ не лічыць магчымым выдзяліць беларускаму боку расейскія дазволы на перавозку грузаў у/з трэціх краін з прычыны таго, што ўрад Беларусі да сёння не прыняў мераў па паляпшэнні ўмоў транзіту расейскіх грузаў з Калінінградскай вобласці. Пра гэта паведамляе прэс-служба Мінтранса.

Далей у паведамленні канстатуецца, што з студзеня 2007 года беларускія мытныя органы даглядаюць усе расейскія тавары, якія ідуць з Калінінградскай вобласці транзітам цераз Беларусь на астатнюю частку тэрыторыі РФ, а таксама ў абавязковым парадку канваююць транспартныя сродкі, паведамляе Прайм-ТАСС.

У выніку гэтых мераў на беларуска-літоўскім участку мяжы сабралася шмат транспартных сродкаў у чаканні афармлення працэдуры дастаўкі і прыбыцця нарадаў канвою. Акрамя таго, гэта прывяло да дадатковых фінансавых марнаванняў за афармленне электронных і папяровых дакументаў кантролю дастаўкі тавараў, за аплату канвою, а таксама за прастой кожнага транспартнага сродку ў пунктах прыняцця апавяшчэнняў (ППА) на расейска-беларускай мяжы.

Дзеянні мытных органаў Беларусі, адзначаецца ў дакуменце, з’яўляюцца парушэннем сумесных дамоўленасцяў 1998 г. па транзіце расейскіх тавараў цераз Беларусь і ствараюць напружанасць на межах. Транспартныя кампаніі Калінінградскай вобласці нясуць істотныя страты з прычыны прастояў, зрыву кантрактных абавязальніцтваў, аплаты канвояў і стаянкі. У мэтах вырашэння сітуацыі на расейска-беларускай мяжы Федэральная мытная служба Расеі ў сярэдзіне студзеня афіцыйна звярнулася ў Дзяржаўны мытны камітэт Беларусі з прапановамі па ўрэгуляванні сітуацыі. Да сёння ўрад Беларусі ніякіх мераў не прыняў.