Аляксандр Мілінкевіч даў інтэрв’ю «Reuters» :: Хартыя'97 :: Навiны

6 лютага лідэр дэмакратычных сіл Беларусі Аляксандр Мілінкевіч даў інтэрв’ю інфармацыйнаму агенцтву “Reuters”. У гэты ж дзень інтэрв’ю агенцтву, нагадаем, даў Аляксандр Лукашэнка.

У інтэрв’ю “Reuters” Аляксандр Мілінкевіч заявіў аб гатоўнасці пачаць дыялог з уладай і садзейнічаць у нармалізацыі эканамічных і палітычных кантактаў Беларусі і Еўрапейскага саюза:

- Калі б улада пачала рэформы, я гатовы аказаць дапамогу ў прыцягненні ў Беларусь еўрапейскіх рэсурсаў. Калі ўлада пачне выконваць пэўныя ўмовы, як Еўропа, так і мы, дэмакратычныя сілы, адкрытыя да супрацоўніцтва. Я гатовы да сумесных, узгодненых дзеянняў, але режим павінен пачаць вызваляць палітычных зняволеных, даць свабоду прэсе, партыям і грамадскім арганізацыям. Пасля выканання гэтых умоваў, я першы выступлю за аднаўленне эканамічных і палітычных кантактаў Еўропы з Беларуссю, - сказаў Аляксандр Мілінкевіч у інтэрв’ю інфармацыйнаму агенцтву "Reuters".

Аляксандр Мілінкевіч заявіў, што адмовай ад прапановаў аб’яднанай Еўропы Аляксандр Лукашэнка ставіць Беларусь на мяжы самаізаляцыі, а беларускі народ выракае на перспектыву збяднення.

- Упэўнены, што ўлада да канца яшчэ не адчула ўсёй небяспекі, якая пагражае ў сённяшняй сітуацыі беларускай эканоміцы. Яна думае, што існуючая камандная сістема кіравання эканомікай яшчэ мае рэзервы і рэсурсы. Гэта памылка, якая будзе дорага каштаваць беларусам. Пытанне ў тым, на якія крокі ўлада сёння гатовая пайсці, каб выправіць сітуацыю. Я не хачу, каб у краіне здарыўся абвал эканомікі. Я катэгарычна супраць эканамічных санкцый у дачыненні Беларусі, - сказаў Аляксандр Мілінкевіч у інтэрв’ю.