МЗС заклікае да перамоваў :: Хартыя'97 :: Навiны

Профільныя ведамствы Беларусі і Расеі павінны вырашыць сітуацыю з выдачай дазволаў беларускім перавозчыкам. “У нас існуе пагадненне СНД аб супрацоўніцтве ў галіне транспарту, ёсць камісія па функцыянаванні агульнай транспартнай сістэмы “саюзнай дзяржавы”, экспертам варта садзіцца і дамаўляцца”, – адзначыў на брыфінгу ў Менску прэс-сакратар беларускага знешнепалітычнага ведамства Андрэй Папоў.

А.Папоў звярнуў увагу на тое, што штогод з Еўропы ў Расею і ў адваротным напрамку цераз тэрыторыю Беларусі перамяшчаюцца мільёны тон грузу.

Нагадаем, што Міністэрства транспарту РФ не лічыць магчымым выдзяліць беларускаму боку расейскія дазволы на перавозку грузаў у/з трэціх краін з прычыны таго, што ўрад Беларусі да сёння не прыняў мераў па паляпшэнні ўмоў транзіту расейскіх грузаў з Калінінградскай вобласці.

З студзеня 2007 г. беларускія мытныя органы надглядаюць усе расейскія тавары, якія паступаюць з Калінінградскай вобласці транзітам цераз Беларусь на астатнюю частку тэрыторыі РФ, а таксама ў абавязковым парадку канваююць транспартныя сродкі.

У выніку гэтых мераў на беларуска-літоўскім участку мяжы сабраліся шматлікія транспартныя сродкі у чаканні афармлення працэдуры дастаўкі і прыбыцця нарадаў канвою. Акрамя таго, гэта прывяло да дадатковых фінансавых марнаванняў за афармленне электронных і папяровых дакументаў кантролю дастаўкі тавараў, аплату канвою, а таксама прастою кожнага транспартнага сродку ў пунктах прыняцця апавяшчэнняў (ППА) на расейска-беларускай мяжы.