Казулін: «Акцыя 25 сакавіка мусіць прайсці на Кастрычніцкай плошчы, альбо на плошчы Каліноўскага» :: Хартыя'97 :: Навiны

Экс-кандыдат у прэзідэнты, лідэр БСДП (Грамада) Аляксандр Казулін вітае правядзенне ў Менску масавых акцый апазіцыі і салідарны з іх удзельнікамі. Пра гэта БелаПАН паведаміў адвакат палітыка Ігар Рынкевіч, які сёння сустрэўся ў калоніі “Віцьба–3” з сваім падабаронным.

Па словах І.Рынкевіча, лідэр БСДП (Грамада) вітае правядзенне моладзевай акцыі “Беларусь – у Еўропу”, якая прызначаная на 14 лютага. “Казулін паведаміў, што калі ў гэты дзень працягнуцца рэпрэсіі ў дачыненні моладзі, якая патрабуе еўрапейскага шляху развіцця, то гэта будзе відавочны сігнал Захаду: кіраўніцтва Беларусі не мае намеру весці дыялог з Еўропай і б’е па працягнутай руцэ Еўразвяза”.

Што да Дня Волі 25 сакавіка, то А.Казулін лічыць магчымым правядзенне акцыі толькі ў адным месцы. “Гэта павінна быць Кастрычніцкая плошча, калі ўлады дазволяць яе правядзенне і далучацца да свята, альбо плошча Каліноўскага, калі такі дазвол атрыманы не будзе”, – адзначыў А.Казулін.

Нагадаем, Кастрычніцкая плошча Менска была нефармальна пераназваная ў плошчу Каліноўскага ўдзельнікамі акцый пратэсту 19–25 сакавіка мінулага года.

“Калі рэжым працягне рэпрэсіі ў дачыненні актывістаў грамадзянскай супольнасці, маладых людзей, то гэта канчаткова дыскрэдытуе ўладу”, – перадае словы А.Казуліна яго адвакат.