У Дзярждуме абураныя заявамі беларускага кіраўніка ў адрас Расеі :: Хартыя'97 :: Навiны

Віцэ-спікер Дзярждумы ад “Единой России” Уладзімір Пехцін здзіўлены тымі ацэнкамі расейска-беларускіх стасункаў, якія даў Аляксандр Лукашэнка ў інтэрв’ю заходнім журналістам.

“Заявы прэзідэнта Беларусі, у тым ліку і наконт стасункаў з Расеяй, ніяк не спрыяюць будаванню саюзнай дзяржавы”, – сказаў У.Пехцін “Інтэрфаксу”.

“Расея на тэрыторыі СНД імкнецца развіваць з усімі сябрамі Садружнасці адкрытыя партнёрскія стасункі. Пераход на рынкавыя правілы ўзаемінаў паміж Расеяй і Беларуссю ў энергетычнай сферы ўсталёўвае пэўныя і транспарэнтныя правілы гульні на ўзаемавыгодных умовах, і мы не здольныя далей субсідаваць эканомікі іншых краін, у тым ліку і Беларусі, за кошт расейскіх падаткаплацельшчыкаў”, – падкрэсліў У.Пехцін.

Пры гэтым ён адзначыў, што падчас пераходу на рынкавыя стасункі, неабходна “ўзважана падыходзіць да ацэнак сітуацыі ў стасунках паміж Расеяй і Беларуссю, і зрабіць усё магчымае для ўмацавання саюза брацкіх народаў дзвюх краін”.

У сваю чаргу першы віцэ-спікер Дзярждумы ад “Единой России” Любоў Сліска лічыць, што А.Лукашэнка фактычна здраджвае агульным расейска-беларускім інтарэсам, калі дае антырасейскія інтэрв’ю заходнім СМІ: “Тое, што ён гаворыць, больш падобна на здраду нашым славянскім, расейска-беларускім інтарэсам”.

Раней А.Лукашэнка заявіў, што “расейская палітыка ўсё больш прыпадабняецца амерыканскай, і ў ёй з’явіліся нейкія імперскія замашкі”. А.Лукашэнка таксама заявіў, што ён “прызнае памылку і недахоп беларускай знешняй палітыкі – яна атрымалася аднавектарная з вектарам у бок Расеі, і мы фактычна страцілі Захад”.

На думку Л.Сліскі, калі ў стасунках паміж РФ і Беларуссю сапраўды існуюць сур’ёзныя праблемы, то іх трэба вырашаць шляхам двухбаковых кансультацый: “Пэўна, было б больш сумленна сесці разам з расейскім прэзідэнтам і абмеркаваць усе тыя балючыя праблемы, разабрацца, хто і чаму, калі не выканаў свае абяцанні, у тым ліку наконт будавання саюзнай дзяржавы”.