«Белтрансгаз»: Беларусь цалкам разлічылася з Расеяй за газ :: Хартыя'97 :: Навiны

Беларусь на 20 студзеня практычна цалкам разлічылася за прыродны газ, які пастаўляўся ў рэспубліку ў 2006 годзе з Расеі, паведаміў на паседжанні калегіі ў Гародні намеснік генеральнага дырэктара “Белтрансгаза” Цветамір Сарахан.

“У 2006 годзе ўзровень разлікаў з спажыўцамі за пастаўлены газ складаў 100,6%, што дазволіла нам у поўным памеры рэструктураваць запазычанасць ААТ “Газпром” па плацяжах і выплаціць $78,5 млн. у якасці асноўнай запазычанасці і каля $19 млн. – у якасці пені", – сказаў Ц.Сарахан, падкрэсліўшы, што на 20 студзеня Беларусь цалкам завяршыла разлік з “Газпромам” за пастаўкі газу ў 2006 годзе, паведамляе “Інтэрфакс” .

У той самы час, як паведаміў на паседжанні калегіі міністр энергетыкі Беларусі Аляксандр Азярэц, на пачатак года Беларусь мае рэшткавую запазычанасць перад “Газпромам” у памеры $27,9 млн. “Гэта пеня па разліках мінулых гадоў і “Белтрансгаз” мусіць прыняць меры па іх спісанні”, – сказаў міністр.

“Жорсткія ўмовы кантракту з “Газпромам”, заключанага на 4 гады, прадугледжваюць скарачэнне паставак прыроднага газу ў Беларусь на адсотак недаплаты. Гэта патрабуе пошукаў новых падыходаў да аплаты прыроднага газу беларускімі спажыўцамі”, – падкрэсліў падчас выступу на паседжанні калегіі Ц.Сарахан.

На яго думку, у Беларусі неабходна ўзмацніць нарматыўную базу па прымяненні мераў да падаткаплацельшчыкаў. Прадстаўнік “Белтрансгаза” таксама лічыць, што ўрад Беларусі мусіць дазволіць ААТ “Белтрансгаз” працаваць з усімі ўстановамі банкаўскай сістэмы Беларусі. Ва ўмовах жорсткай фінансавай дысцыпліны ў 2007 годзе “Белтрансгаз”, магчыма, будзе прыцягваць крэдыты для разлікаў з “Газпромам”, “каб не атрымоўваць ад расейскага партнёра штрафных санкцый і не ўскладняць палітычнае пытанне”, падкрэсліў Ц.Сарахан.

Ён таксама паведаміў, што ў 2007 годзе рэнтабельнасць працы акцыянернага таварыства складзе 2,6% супраць 3,9% у 2006 годзе.