Кіраўнік МЗС Расеі абвінаваціў Беларусь у парушэнні абавязальніцтваў :: Хартыя'97 :: Навiны

Расея не парушала абавязальніцтваў па пастаўках энерганосьбітаў у Еўропу, абавязальніцтвы былі парушаныя транзітнымі краінамі, паведаміў кіраўнік МЗС РФ Сяргей Лаўроў. “Расея, як вы ведаеце, і ў выпадку з Украінай у студзені мінулага года, і ў выпадку з Беларуссю ў поўнай меры выконвала свае кантрактныя абавязальніцтвы. Абавязальніцтвы свае – і ў тым, і ў іншым выпадку – парушалі нашы партнёры, якія з’яўляюцца транзітнымі краінамі. Я магу Вам гарантаваць на 100% , што ніколі, ні пры якіх абставінах Расея не парушыць нешта, пад чым стаіць яе подпіс. Гэта гарантавана”, – сказаў ён у інтэрв’ю нямецкаму часопісу “Дэр Шпігель”.

Па яго словах, “працаваць трэба – тым, хто з’яўляецца спажыўцамі, – найперш з транзітнымі краінамі”.

Пры гэтым ён зазначыў, што і Расея, у сваю чаргу, будзе рабіць усё, каб парушальнікаў стала менш, паведамляе РІА “Новости”.

“Па-першае, я ўжо сказаў пра тое, што з пераходам на рынкавыя цэны ўсе павінны з гэтым звыкнуцца, гэта само па сабе ўхіліць пагрозу новых адбораў на тэрыторыі транзітных краін, а галоўнае – мы ўжо запланавалі і пачалі будаўніцтва трубаправодаў і будзем працягваць будаўніцтва трубаправодаў, якія, па сутнасці, зробяць Расею самадастатковай у плане дастаўкі газу і нафты на свае межы, у свае парты – з тым, каб напроста, сваімі ўласнымі сіламі пастаўляць энергарэсурсы спажыўцам”, – адзначыў Лаўроў.

Як паведаміў кіраўнік МЗС РФ, гэта не азначае, што Расея больш не будзе выкарыстоўваць нафта- і газаправоды.

“Мы проста хочам мець альтэрнатыўныя, страховачныя маршруты. Скарачаць пастаўкі газу і нафты па ўсіх трубаправодах, якія цяпер дзейнічаюць, мы не будзем. Усе наяўныя кантракты будуць свята выконвацца”, – сказаў ён.