Мiхаiл Мяснiковiч шкадуе, што ў свой час не падтрымаў ЗША :: Хартыя'97 :: Навiны

“Расiя ў адносiнах да Беларусi паступiла, мякка кажучы, вельмi непрыгожа i нядобрасумленна, — сказаў ”Народнай волi" старшыня прэзiдыума Нацыянальнай акадэмii навук Беларусi, былы кiраўнiк Адмiнiстрацыi прэзiдэнта Мiхаiл Мяснiковiч, выказваючы сваё стаўленне да праблемы з энерганосьбiтамi. — Дакладней, не Расiя, а асобныя службовыя асобы. А палiтыкi пагадзiлiся... Я лiчу, што гэта няправiльна. Ёсць каштоўнасцi, якiя нельга вымяраць доларамi i рублямi.

Магу сказаць iншае. У 1992 годзе я быў на адным, лiчу, важным пасяджэннi ў Кiеве, дзе разглядалася пытанне пра тое, як нафту i газ з Азербайджана, Iрана i iншых дзяржаў падаць у Еўропу, мiнуючы Расiю. У гэтым пасяджэннi бралi ўдзел Беларусь, Украiна, Малдова, Грузiя i Азербайджан. Старшынствавалi на пасяджэннi Злучаныя Штаты Амерыкi. Але беларусы тады адстойвалi расiйскi вектар. Я вось зараз думаю: напэўна, мы тады даволi прымiтыўна разглядалi перспектыву палiтычных адносiн...

Я, шчыра кажучы, ад расiйскага боку не чакаў такога выхаду з саюзных адносiн... Мне, можа, як нiкому iншаму балюча, бо я, што называецца, рабiў усе гэтыя пагадненнi, дамоўленасцi i г.д. Роўныя ўмовы i роўныя правы — гэта базавыя прынцыпы нашых пагадненняў. Але, аказваецца, можна праiгнараваць тое, што было падпiсана, ратыфiкавана, i паставiць нейкiя прыватныя iнтарэсы вышэй за ўсё гэта...

Я лiчу, што ў гэтай сiтуацыi мы павiнны рэчы называць сваiмi iмёнамi...", -- сказаў Мясніковіч.

Дарэчы, у наступным годзе ўжо павiнна распачацца практычная праца па будаўнiцтве беларускай АЭС. Пра гэта Мяснiковiч паведамiў на сустрэчы з журналiстамi.

Паводле ягоных слоў, Беларусь пры выбары праекта для будаўнiцтва атамнай станцыi не прывязваецца да канкрэтнай краiны-партнёра, а сыходзiць перш за ўсё “з меркаванняў надзейнасцi”.

Акрамя гэтага, Беларусь пры выбары партнёраў будзе таксама ўлiчваць i “пытаннi, звязаныя з палiтычнымi нюансамi”.

На думку Мяснiковiча, адной з самых перадавых сёння з`яўляецца французская ядзерная энергетыка. У прыватнасцi, Беларусь будзе весцi перамовы пра АЭС з кампанiяй “Арэва”.

Як сказаў Мяснiковiч, мяркуемы кошт будаўнiцтва АЭС складзе прыблiзна 2,5—3 мiльярды долараў у разлiку на 2 энергаблокi па 1 тысячы МВт. Першы энергаблок плануецца ўвесцi ў эксплуатацыю да 2014 года, другi — да 2020-га.

На канчатковае вырашэнне ўсiх пытаняў, якiя тычацца абмеркавання i выбару праекта i крынiцы фiнансавання, на думку Мяснiковiча, спатрэбiцца максiмум паўгода.