Шродар абараняе ў Брусэлі праект будаўніцтва Балтыйскага газаправода :: Хартыя'97 :: Навiны

Кіраўнік наглядальнага савета кампаніі North Stream Герхард Шродар учора ў Брусэлі правёў акцыю ў абарону праекту па будаўніцтве газаправода “Паўночны паток” па дне Балтыйскага мора. Разам з кіраўніком кампаніі Маціасам Варнігам экс-канцлер ФРГ правёў перамовы з камісарам ЕЗ па энергетыцы Андрысам Пібалгсам, а таксама з сваім калегам па сацыял-дэмакратычнай партыі, еўракамісарам па прамысловасці Гюнтерам Ферхойгенам. Як стала вядома, спадар Ферхойген сказаў, што камісія ЕЗ разглядае будаўніцтва газаправода ў якасці “прыярытэту”. Для эмісараў “Паўночнага патоку” гэта цяпер дастаткова важная ацэнка: двуадзіная задача спадароў Шродара і Варніга складаецца з прыцягнення на свой бок не толькі буйных інвестараў, але і ўплывовых еўрапейскіх палітыкаў, піша «Время новостей».

Пасля сустрэч з службоўцамі кіраўнікі North Stream правялі прэс-канферэнцыю. Нямецкія масмедыа назвалі паездку спадароў Шродара і Варніга ў сталіцу Еўропы “рэкламным турам”. Герхард Шродар быў настроены аптымістычна: “Праект Паўночна-Еўрапейскага газаправода будзе выкананы ў прызначаныя тэрміны”, – паведаміў ён журналістам. “Усялякія заклапочанасці, выказаныя з нагоды экалагічнай бяспекі праекту, не застануцца без увагі і будуць уважліва вывучаныя, – сказаў спадар Шродар. – Мы гарантуем поўную транспарэнтнасць”.

Як і незадоўга да гэтага ў сваім выступе ў берлінскім гатэлі Adlon, экс-канцлер падкрэсліў важную ролю газаправода для энергетычнай бяспекі не толькі Нямеччыны, але і ўсёй Еўропы. Кампанія North Stream плануе пракласці першае адгалінаванне “Паўночнага патоку” ў 2010-м, а другое – у 2012-м годзе. Спадар Шродар адзначыў, што ЕЗ у сувязі з ростам спажывання энергіі да 2050 года павінен будзе павялічыць імпарт газу на 200 млрд. кубаметраў у год. “Пры цяперашняй інфраструктуры гэта немагчыма”, – падкрэсліў ён. Пры гэтым “Паўночны паток” на Захад будзе пастаўляць каля 55 млрд. кубаметраў. Таму ніякай канкурэнцыі ўсім іншым газатранспартным сістэмам “Паўночны паток”, як упэўнівае ён, не складзе. “Працы хопіць усім, усе будуць у выйгрышы”, – паабяцаў кіраўнік праекту ўсім яго прыхільнікам і супернікам адначасова.

На фоне наяўнай крытыкі расейскай тактыкі закручвання газавага крана ў спрэчках з Украінай і Беларуссю рэзкім дысанансам гучалі ўчора ў Брусэлі ацэнкі спадароў Шродара і Варніга ў дачыненні шляхоў дасягнення надзейнага і бяспечнага энергазабеспячэння для Еўропы. Пастаўкі па “Паўночным патоку” ўжо неўзабаве дазволяць пазбегнуць патэнцыйных прабелаў у імпарце газу. Але нават не гэта самае галоўнае з пункту гледжання былога нямецкага канцлера. Такога пастаўшчыка, як Расея, у параўнанні з патэнцыйнымі альтэрнатыўнымі экспарцёрамі прыроднага газу, такімі, як Лівія, Алжыр, Нігерыя або Іран, на яго думку, можна лічыць “узорным хлопчыкам”. “Не існуе больш надзейнай і стабільнай краіны, калі гаворка ідзе пра надзейнасць паставак”, – упэўнены ён. У Брусэлі, магчыма, у гэтым перакананыя не так цвёрда, але праект “Паўночны паток” падтрымліваюць. Засталося пераканаць Варшаву.