Затрыманых пад Менскам актывістаў вызвалілі :: Хартыя'97 :: Навiны

Усе затрыманыя 10 лютага пад Менскам актывісты арганізацыі “Задзіночанне беларускіх студэнтаў” (ЗБС) былі вызваленыя з міліцыі ў той самы дзень увечары пасля таго, як далі тлумачэнні. Пра гэта БелаПАН паведаміў адзін з прадстаўнікоў ЗБС. Паводле яго інфармацыі, з кожнага былі ўзятыя пісьмовыя тлумачэнні. Ва ўсіх узялі адпячаткі пальцаў, а таксама заснялі на відэа. Пры гэтым якія-небудзь абвінавачванні і пратаколы аб парушэннях складзеныя не былі. Апошніх затрыманых вызвалілі прыкладна а 23 гадзіне.

Нагадаем, каля 30 актывістаў арганізацыі, ліквідаванай у 2001 годзе паводле рашэння Вярхоўнага суду Беларусі, сабраліся ў прыватным катэджы пад Менскам, каб абмеркаваць падрыхтоўку да з’езду ЗБС. Дом быў арэндаваны. У 16.30 туды ўварваліся супрацоўнікі міліцыі і КДБ. Свае дзеянні яны растлумачылі тым, што да іх нібыта дайшла інфармацыя пра тое, што ў гэтым доме знаходзіцца прытон, а таксама тут хаваюць наркотыкі і нелегальны алкаголь. Пасля ператрусу ў доме моладзевых актывістаў адвезлі ў адно з аддзяленняў Менскага РУУС.

Трэба адзначыць, што тыдзень таму, 4 лютага, на прыватнай кватэры ў Менску былі затрыманыя 27 актывістаў незарэгістраванай арганізацыі “Малады Фронт”, якія сабраліся для правядзення паседжання цэнтральнай рады арганізацыі. Два з іх – Зміцер Хведарук і Алег Корбан – правялі трое сутак у следчым ізалятары КДБ. У іх дачыненні ўзбуджаная крымінальная справа па артыкуле 193-1 Крымінальнага кодэкса (дзейнасць ад імя незарэгістраванай арганізацыі). Ён прадугледжвае наступнае пакаранне: штраф, арышт на тэрмін да шасці месяцаў альбо пазбаўленне волі на тэрмін да двух гадоў.