Прадпрымальнікі падалі заяўку на правядзенне мітынгу 12 сакавіка :: Хартыя'97 :: Навiны

Актывісты прадпрымальніцкага руху Сяргей Балыкін і Аляксандр Макаеў падалі ў Менскі гарвыканкам заяўку на правядзенне ў сталіцы мітынгу 12 сакавіка. Як паведаміў БелаПАН С.Балыкін, заяўленай мэтай мітынгу з’яўляецца прыцягненне ўвагі грамадскасці да праблем індывідуальных прадпрымальнікаў і выпрацоўка прапаноў па ўдасканаленні прававога рэгулявання прадпрымальніцкай дзейнасці ў краіне.

“Непасрэднай прычынай для правядзення мітынгу з’яўляецца выданне прэзідэнтам у канцы мінулага года ўказу № 760, якім з 1 красавіка 2007 года індывідуальным прадпрымальнікам – плацельшчыкамі адзінага падатку – забараняецца гандаль цэлай групай тавараў, а з 1 студзеня 2008 года ўводзіцца фактычная забарона на выкарыстанне наёмнай працы, – распавёў Сяргей Балыкін. – На нашу думку, апошняя забарона прывядзе да фактычнага знішчэння малога бізнэсу ў Беларусі ў форме індывідуальнага прадпрымальніцтва. Вялікай колькасці ІП давядзецца прайсці перарэгістрацыю і стварыць юрыдычную асобу. Але далёка не ўсе пераадолеюць гэты шлях”.

Ініцыятары мітынгу просяць гарвыканкам дазволіць яго правядзенне на плошчы Якуба Коласа. Пры гэтым не выключаюць, што месцам акцыі гарадскія ўлады традыцыйна прызначаць плошчу Бангалор.

С.Балыкін растлумачыў, чаму мітынг плануюць правесці ў панядзелак: гэта адзіны выходны дзень у большасці індывідуальных прадпрымальнікаў.

Нагадаем, што Сяргей Балыкін з’яўляецца адным з ініцыятараў стварэння ў Беларусі для прадстаўлення і абароны агульных эканамічных інтарэсаў і каардынацыі прадпрымальніцкай дзейнасці новага аб’яднання ІП. Плануецца, што яно не будзе далучацца да катэгорыі грамадскіх. Грамадзянскі кодэкс, па словах С.Балыкіна, дазваляе індывідуальным прадпрымальнікам ствараць такое аб’яднанне на прынцыпах, якія раней яны не выкарыстоўвалі. Цяпер такая форма рэалізуецца ў рамках дзейнасці аб’яднанняў прадстаўнікоў сярэдняга і буйнога бізнэсу.

“Для дасягнення мэты неабходнае аб’яднанне як мага большай колькасці індывідуальных прадпрымальнікаў. На жаль, ніводнае з наяўных цяпер прадпрымальніцкіх аб’яднанняў не ў стане паўнавартасна адстойваць інтарэсы ІП, – адзначае С.Балыкін. – Асноўная праблема – адсутнасць кваліфікаванай эканамічнай і юрыдычнай экспертызы рашэнняў, якія прымае дзяржава, а таксама недастатковая прапрацоўка прапаноў прадпрымальніцкай супольнасці”.