Лукашэнка разлічвае на Францыю ў дыялогу паміж Беларуссю і ЕЗ :: Хартыя'97 :: Навiны

Аляксандр Лукашэнка выказаў зацікаўленасць у актывізацыі ўзаемадзеяння з Францыяй і разлічвае, што гэтая краіна здолела б заняць узважаную пазіцыю ў дыялогу паміж Беларуссю і Еўрапейскім Звязам.

“Зацікаўленасць Беларусі ў актывізацыі ўзаемадзеяння з Французскай Рэспублікай, абумоўленая найперш яе значнай роляй у палітычным і эканамічным жыцці Еўропы”, – сказаў А.Лукашэнка, калі прымаў даверчыя граматы ў Надзвычайнага і Паўнамоцнага амбасадара Францыі ў Беларусі Мірэй Мюсо, паведамляе “Інтэрфакс”.

Беларускі кіраўнік адзначыў, што “Францыя здолела б заняць узважаную пазіцыю пры правядзенні ўсебаковага дыялогу паміж Беларуссю і Еўрапейскім Звязам”. “Наша краіна неаднаразова пацвярджала сваю гатоўнасць да адкрытага супрацоўніцтва з Еўропай на падставе ўзаемнай павагі і выгоды”, – сказаў А.Лукашэнка.

У сваю чаргу французская дыпламатка паведаміла журналістам, што “Францыя, як і іншыя краіны Еўразвяза, гатовая развіваць стасункі з Беларуссю. Мы спадзяемся, што кожны з бакоў будзе прытрымлівацца ўзятых на сябе абавязальніцтваў пасля праведзенай у снежні 2006 года сустрэчы беларускага боку з “еўратройкай”, – сказала М.Мюсо.

Яна таксама выказала надзею на “дэмакратычнае развіццё беларускага грамадства”. “Мы спадзяемся, што Беларусь зойме сваё месца ў сям’і еўрапейскіх краін”, – паведаміла амбасадарка. “Мы падтрымліваем незалежную Беларусь і спадзяемся, што Беларусь будзе ўдзельнічаць у палітыцы добрасуседства, якую праводзіць Еўрапейскі Звяз”, – адзначыла М.Мюсо.