Святлана Калінкіна: «Лукашэнка павінен атрымаць спарынг-партнёра» :: Хартыя'97 :: Навiны

Вядомая беларуская журналістка Святлана Калінкіна пракаментавала на сайце “Белорусский партизан” зварот лідэра дэмакратычных сілаў Беларусі Аляксандра Мілінкевіча да Аляксандра Лукашэнкі з заклікам пачаць дыялог з беларускай апазіцыяй і, як вынік, палепшыць стасункі з Захадам. Па словах Калінкінай, у Брусэлі ўсё часцей чутныя галасы тых, хто лічыць немэтазгодным прабачаць Лукашэнку яго грахі толькі таму, што ў беларускага лідэра сапсаваліся стасункі з Масквой. “Спыніць механізм перамоваў, які працуе ўхаластую, цяпер можа вельмі просты ход: Лукашэнка павінен атрымаць спарынг-партнёра. У ролі такога і выступіў Аляксандр Мілінкевіч. Калі Аляксандр Уладзіміравіч больш выразна сфармулюе сваю ідэю, то ён проста не пакіне Лукашэнку шанцаў дурыць галаву еўрапейскім службоўцам”, – лічыць журналістка.

У адрозненні ад прапановы сацыял-дэмакрата Уладзіміра Нісцюка, якая ў свой час таксама стала сенсацыяй, Мілінкевіч не высоўвае перамовы як дастатковую ўмову рэабілітацыі рэжыму. Але пакуль яшчэ выразна не фармулюе і асноўнае патрабаванне – унутраны дыялог і палітычныя рэформы павінны папярэднічаць знешняму, адзначае Калінкіна.

“Чыста тэарэтычна можна ўявіць, на якіх умовах Лукашэнка мог бы імітаваць перамовы з Еўропай. Але ў сцэнары еўрапейскай гульні афіцыйнага Менска самае слабае звяно – апазіцыя. Дзяржаўная прапаганда завіхаецца, каб ні ў каго ў Беларусі не ўзнікла нават думкі пра тое, што Лукашэнка робіць рэверансы Еўропе пад ціскам сваіх палітычных супернікаў”, – лічыць Святлана Калінкіна.

“Менавіта таму пра тое, што кіраўнік ПАРЕ Рэнэ Ван дэр Ліндэн сустракаўся не толькі з афіцыйнымі асобамі, але і з лідэрамі апазіцыйных партый – ні слова. Пра тое, што агенцтва “Рэйтэр” узяло інтэрв’ю не толькі ў Аляксандра Лукашэнкі, але і ў Аляксандра Мілінкевіча – ні паўслова. Інфармацыя выбудоўваецца так, быццам не Менск кінуўся шукаць спагады на Захадзе, а, наадварот, еўрапейскія краіны раптам усвядомілі значнасць Лукашэнкі. У гэтым сэнсе горшай “дапамогі”, чым рука, працягнутая Аляксандрам Мілінкевічам, беларускі лідэр і прыдумаць не мог. Таму вось ужо некалькі дзён дзяржаўная прапаганда нават не ведае, як адрэагаваць. Маўчыць”, – адзначае журналістка.