Экс-кіраўнік Нацбанка Беларусі: Урад можа вельмі хутка нарасціць запазычанасці :: Хартыя'97 :: Навiны

Асноўнай формай запазычанасцяў Беларусі на знешніх рынках мусіць стаць выпуск і размяшчэнне аблігацый. Такога пункту гледжання прытрымліваецца Міністэрства фінансаў Беларусі. З дапамогай гэтых каштоўных папер у Беларусь у 2007 годзе плануецца прыцягнуць да 1 мільярда даляраў знешняга фінансавання. У той час незалежныя аналітыкі сумняваюцца ў мэтазгоднасці такога кроку, паведамляе “Нямецкая хваля”.

У Мінфіне распачаць знешняе запазычанне плануюць ужо ў канцы лютага. Прычым у якасці краіны размяшчэння аблігацый найперш разглядаецца Расея.

Так, цяпер беларускі Мінфін ужо вядзе працу з Федэральнай службай Расеі па падрыхтоўцы нарматыўных актаў, якія вызначаюць умовы выпуску каштоўных папер. Мяркуюць, што першы выпуск будзе ажыццёўлены ў аблігацыях на суму да 10 мільярдаў расейскіх рублёў на тэрмін пагашэння аблігацый да 5 гадоў. Іх прыбытковасць будзе ўсталёўвацца асобна па кожным выпуску Міністэрствам фінансаў Беларусі па ўзгадненні з урадам.

Плануецца, што асноўнымі арганізатарамі пазыкі будуць Банк знешняга гандлю Расеі, Росбанк і інвестыцыйная група Рэнесанс Капітал. Акрамя таго, як адзначаюць у Мінфіне, да беларускіх аблігацый выяўляюць інтарэс і буйныя заходнія фінансавыя структуры.

На думку экс-кіраўніка Нацбанка Беларусі, эканаміста Станіслава Багданкевіча, прыцягнуць у краіну мільярд даляраў пазыкі цалкам рэальна. Тым больш, што цяпер беларуская знешняя запазычанасць адносна невялікая – блізу 800 мільёнаў даляраў, да крэдытных абавязальніцтваў рэспубліка ставіцца вельмі педантычна, а да інструменту аблігацыйнага запазычання раней не звярталася. Гэта значыць, цяпер яно магчыма, але, па словах Станіслава Багданкевіча:

“Іншае пытанне, што я асабіста, як эканаміст, не разумею, для чаго гэта трэба. Бо летась бюджэт Беларусі быў з прафіцытам, сёлета нейкія праблемы невялікія ёсць, але яны, я б не сказаў, што вельмі значныя. Бо ёсць свабодныя грошы ў фондзе Нацыянальнага развіцця, 600 мільёнаў даляраў незмарнаваныя. Таму ніякай праблемы для бюджэту я не бачу асабіста. Я толькі думаю, што мабыць, улады не думаюць змяняць сваю мадэль гаспадарання”.

Як лічыць Станіслаў Багданкевіч, калі дзяржава з дапамогай аблігацый хоча вырашыць праблемы сваіх прадпрыемстваў, то гэта няправільна, бо прадпрыемствы павінны самі вучыцца вырашаць уласныя праблемы. Пад розныя пазыкі павінны прапаноўвацца пэўныя праекты, павінен фармавацца і працаваць рынак каштоўных папер. А залазіць у запазычанасці пад урадавыя гарантыі, на думку Станіслава Багданкевіча, дзяржава не павінна:

“Для чаго гэта трэба ўсё? Запазычанасці ўрад можа нарасціць вельмі хутка. Яны могуць расці як снежны ком… Сёння 800 бачу даляраў запазычанасці ўрада, а заўтра пад 2 мільярды. Так хіба гэта нармальны шлях развіцця?”

Па словах Станіслава Багданкевіча, згадваючы пра аблігацыйнае запазычанне, шмат хто забывае, што гэтыя даўгі давядзецца калісьці аддаваць. А як гаворыцца, аддаваць грошы заўсёды дрэнна. Бо пазычаеш чужое, а аддаваць даводзіцца сваё.