Старшыня ПАРЕ: Уладам Беларусі давядзецца адчыніць дзверы перад палітвязнямі :: Хартыя'97 :: Навiны

“Я раю Беларусі прыняць міжнародных экспертаў з Рады Еўропы, каб яны наведалі турмы і зрабілі даклады пра палітычных зняволеных. Мы лічым гэтых людзей палітычнымі зняволенымі, і яны такімі і з’яўляюцца. І мы хочам, каб улады прынялі гэтыя справаздачы да ведама. Уладам Беларусі давядзецца адчыніць дзверы перад палітвязнямі”, – заявіў старшыня Парламенцкай Асамблеі Рады Еўропы Рэнэ ван дэр Ліндэн.

“У нас ёсць абавязак перад беларускімі людзьмі, якія больш за ўсё церпяць у дадзенай сітуацыі. Яны гэтаксама як і ўсе мы дастойныя таго, каб быць часткай еўрапейскай сям’і. У 1997 годзе парламент Беларусі быў пазбаўлены статуса спецыяльна запрошанага пры Радзе Еўропы, а з 2004 года мы спынілі ўсе кантакты з Беларуссю і абралі палітыку поўнай ізаляцыі. Але яна не прынесла ніякіх вынікаў. І цяпер мы бачым, што для таго, каб прынесці еўрапейскія стандарты ў Беларусь, нам трэба быць праактыўнымі”, – лічыць кіраўнік ПАРЕ.

У той самы час Рэнэ ван дэр Ліндэн у чарговы раз падкрэсліў неабходнасць выканання беларускімі ўладамі вызначаных умоў. Першым крокам да пачатку перамоваў, які мусіць зрабіць Беларусь, на яго думку, з’яўляецца вызваленне палітычных зняволеных. “Я – шчыры прыхільнік дыялогу, і ён будзе, калі Беларусь зробіць першы крок”, – сказаў старшыня ПАРЕ.

Апрача гэтага, “венецыянская камісія павінна вывучыць выбарчае заканадаўства ў Беларусі і даць свае рэкамендацыі па яго змене, каб краіна магла праводзіць свабодныя дэмакратычныя выбары”, лічыць старшыня ПАРЕ.

Разам з тым Рэнэ ван дэр Ліндэн раскрытыкаваў візавую палітыку Еўразвяза ў дачыненні Беларусі, Расеі і балканскіх краін і назваў яе “недапушчальнай”.

“Мы не можам прасіць іх змяніць сітуацыю ў краінах, калі не будзем даваць маладым людзям, студэнтам, шанец прыехаць у Еўропу, атрымаць уражанні, быць уцягнутымі ў еўрапейскі лад жыцця, убачыць на практыцы нашы стандарты і нормы”, – растлумачыў еўрапейскі палітык.

Напрыканцы Рэнэ ван дэр Ліндэн паабяцаў, што “мы будзем змагацца супраць такой візавай палітыкі, бо яна своеасаблівая раздзяляльная рыса”, паведамляе “Нямецкая хваля”.