Расея страціла інтарэс да стварэння АЭП? :: Хартыя'97 :: Навiны

На дадзены момант Расея страціла інтарэс да стварэння Адзінай эканамічнай прасторы (АЭП) з Украінай, Беларуссю і Казахстанам. Такую думку віцэ-прэм’ера, міністра фінансаў Украіны Мікалая Азарава апублікавала сёння, 14 лютага, прэс-служба Партыі рэгіёнаў, – паведамляе карэспандэнт ІА REGNUM у Кіеве.

“У палітычных перамовах з Расеяй, Казахстанам і Беларуссю былі прапушчаныя ініцыятывы, прапушчаны час і дынаміка перамоўнага працэсу. Тая ўлада, якая прыйшла потым пасля нас у 2005 годзе, зрабіла ўсё, каб спыніць і затармазіць гэты працэс”, – перакананы Мікалай Азараў. Ён адзначыў, што “ход развіцця падзей у 2005–2006 гады паказаў, што раз Украіна выйшла з перамоўнага працэсу, мы, па сутнасці, адмовіліся ад гэтых агульных прынцыпаў рынку, і Расея страціла інтарэс да стварэння такога агульнага рынку. Больш за тое, яна ўбачыла выйгрыш у тым, каб перайсці на рынкавыя механізмы цэнаўтварэння ў газавай сферы”.

Па словах першага віцэ-прэм’ера, “пакуль вяртання да тых дамоў, пагадненняў па АЭП, якія былі, інтарэса ў нашых партнёраў – я кажу на жаль – няма”. Ён адзначыў, што больш як 60% украінцаў лічаць АЭП выгоднай для Украіны. “Так я вось, на жаль, хачу іх засмуціць. Але адначасова, у двукоссі, хачу парадаваць праціўнікаў АЭП”, – рэзюмаваў Азараў.