Расея пакіне беларускую «Дружбу» на волю лёсу :: Хартыя'97 :: Навiны

Расейская нафтавая кампанія не будзе рамантаваць нафтаправод “Дружба” ў сувязі з будаўніцтвам нафтаправода ў абыход Беларусі. Як паведамлялася раней, прапампоўка нафты па трубаправодзе “Дружба” ў напрамку літоўскага нафтаперапрацоўчага завода Mazeikiu Nafta была спыненая летась пасля аварыі на трубе.

Паводле крыніцы, блізкай да кампаніі “Транснефть”, на ўзроўні расейскага ўрада ўжо прынятае прынцыповае рашэнне не аднаўляць прапампоўку нафты на Літву і не рамантаваць "Дружбу". Крыніца таксама паведаміла, што ў сувязі з гэтым падрыхтоўка праектнай дакументацыі па будаўніцтве Балтыйскай трубаправоднай сістэмы (БТС–II) вядзецца апераджальнымі тэмпамі, піша газета «Известия».

Як адзначыла ў інтэрв’ю "РБК daily" крыніца, блізкая да "Транснефти", абгрунтаванне інвестыцый па праекце будаўніцтва новага нафтаправода рыхтаваць не плануецца. Не будзе рыхтавацца і асобнага тэхніка-эканамічнага абгрунтавання. Цяпер рыхтуецца праектна-каштарысная дакументацыя. На думку крыніцы, дадзены падыход дазволіць істотна скараціць тэрміны будаўніцтва новага нафтаправода.

Партнёр кансалтынгавай кампаніі RusEnergy Міхаіл Круціхін згодны з прагнозам прэзідэнта "Транснефти", які 13 лютага заявіў, што нафтаправод у абыход Беларусі будзе пабудаваны да сярэдзіны 2008 года, адзначае Telegraf.by.

Нагадаем таксама, што ўчора ў Лондане кіраўнік кампаніі "Транснефть" Сямён Вайншток заявіў пра тое, што Расея здольная ў выпадку неабходнасці аператыўна вырашыць праблему паставак нафты ў абыход Беларусі. Адказваючы падчас дэбатаў на адно з пытанняў з залы, Сямён Вайншток заявіў, што Расеі спатрэбіцца не больш як 18 месяцаў, каб пабудаваць нафтаправод у абыход Беларусі.

“Скажу больш – 18 месяцаў гэта нават вельмі шмат” для такога будаўніцтва, падкрэсліў кіраўнік “Транснефти”. Адначасова ён паведаміў, што ў выпадку неабходнасці будуць “значна” павялічаныя магутнасці расейскага нафтавага экспартнага парта ў Прыморску.